Швейцария вице-канцлери тўсатдан тоғда вафот этди

Швейцария вице-канцлери Андре Симонацци тоғда сайр қилаётганда вафот этди, амалдор 55 ёшда бўлган. Унинг ўлими расмий ҳукумат порталида тасдиқланган.

Федерал кенгаш веб-сайтидаги баёнотга кўра, Андре Симонацци жума куни пиёда сайр вақтида ҳаётдан кўз юмган.

У тоғда дам олишни яхши кўрарди. Жума куни (10 май) ўзининг севимли тоғда юриш машғулотларидан бирида у ҳушини йўқотиб, вафот этди, — дейилади хабарда.

Симонаццининг рафиқаси ва уч нафар фарзанди бор. Федерал кенгаш аъзолари ва канцлер ҳамкасбининг вафоти муносабати билан ҳамдардлик билдирган.

Унинг вафоти ҳақидаги хабар Федерал кенгаш аъзолари ва канцлерни ларзага келтирди. Улар марҳумнинг оиласи ва яқинларига чуқур ҳамдардлик билдиради, — дейилади хабарда.

Симонацци 2008 йил ноябрь ойида вице-канцлер ва Федерал кенгаш спикери этиб тайинланган. 2009 йил 1 январдан бошлаб у ҳукумат йиғилишларида қатнашган, протоколлар олиб борган ва коммуникация билан шуғулланган.

2015 йил бошидан буён Швейцария Конфедерацияси президентига маслаҳат берувчи, хусусан, халқаро алоқалар бўйича президент хизматини ҳам бошқарган.