Белгородда кўп қаватли уй подъезди қулаб тушди (видео)

Белгороднинг Шорса кўчасида 12 май куни ўн қаватли турар жой биносининг подъезди қулаб тушди. Бу ҳақда Deutsche Welle хабар берди.

Ҳодиса юз беришидан аввал шаҳарда ракета ҳужумидан огоҳлантириш сиренаси ишга тушган. Белгород вилояти губернатори Вячеслав Гладковнинг айтишича, подъезд “тўғридан-тўғри снаряд зарбаси натижасида” қулаб тушган.

Россия Мудофаа вазирлиги тарқатган хабарда Украина томони Белгородни “Точка-У” тактик ракета мажмуаси, “Олха” ва РМ-70 “Вампир” ўт очувчи реактив тизимларидан фойдаланган ҳолда ўққа тутгани айтилади. Ҳужумни қайтариш пайтида Россия ҳаво ҳужумидан мудофаа тизимлари олтита “Точка-У” ракетасини, тўртта “Вампир” ва иккита “Олха” реактив тизимини йўқ қилган. Уриб туширилган “Точка-У” ракеталаридан бирининг бўлаклари Белгород шаҳридаги турар жой биносига зарар етказган.

Қулаб тушган подъезд акс этган тасвирларда фақат том қолганини кўриш мумкин. Россия Тергов қўмитаси эълон қилган сўнгги маълумотларга кўра, Белгород ўққа тутилиши оқибатида бир аёл ҳалок бўлган, яна 29 киши жароҳатланган, улар орасида бола ҳам бор.

Маsh Telegram каналининг ёзишича, одамлар қулаб тушган подъезд вайроналари остидан қичқирмоқда. Қутқарув ишлари давомида подъезднинг томи ҳам қулаган, фавқулодда вазиятлар хизмати ходимларининг бир қисми вайроналар остида қолиб кетган.

“Россия Фавқулодда вазиятлар вазирлиги мутахассислари Белгороддаги фавқулодда ҳодиса жойида вайроналар остидан 12 кишини, жумладан, икки болани қутқаришга муваффақ бўлди”, — деб хабар берди вазирлик матбуот хизмати.

Белгородда 62 та хонадонга зарар етган, 11 та машина шикастланган, дейди вилоят губернатори. Украина билан чегара яқинида жойлашган шаҳарда эрталабки иккинчи ракета ҳужумидан огоҳлантириш тревогаси янграганидан кўп ўтмай, подъезд қулагани ҳақидаги хабарлар пайдо бўлди. Украина ҳарбийлари шаҳар ўққа тутилгани ҳақида ҳозирча маълумот бермаган.