Россия ҳарбий кучлари 10 май куни Украинанинг Харьков вилоятига қуруқликдан ҳужум уюштирди. Бу ҳақда Reuters нашри хабар берди.
Манбада айтилишича, Россия кучлари Украинанинг иккинчи йирик шаҳри Харьков яқинида фаол отишма содир этган. Халқаро кузатувчилар ушбу воқеани Украина шарқида янги фронт очилиши сифатида баҳолаган.
Харьков вилоятининг Россия билан чегарасида қизғин ўт очиш бошлангани хабар қилинган. Украина ҳудудга қўшимча кучларни юборган. Россия чегарадаги Волчанск шаҳрини бошқариладиган ҳаво бомбалари ва артиллериядан нишонга олаётгани айтилган.
“Россия Харьков йўналишида қарши ҳужум ҳаракатларининг янги тўлқинини бошлади. Ҳозир бу йўналишда шиддатли жанг кетмоқда”, — деди президент Владимир Зеленский Киевдаги матбуот анжуманида.
Россия Украина мудофаа чизиғини ёриб ўтишга ҳаракат қилаётгани хабар берилган. Украина томони биринчи ҳужум қайтарилганини билдирган.
Расмийлар рус кучлари Волчанск яқинида Украина чегарасини 1 км бузиб кирганини айтган. Қизил ҳудуддаги аҳоли хавфсиз жойга кўчирилган.
Изоҳ (0)