Украина ҳукумати 11 май куни мамлакат шарқидаги Харьков вилоятидан 1700 нафардан ортиқ фуқарони эвакуация қилди. Бу ҳақда Тhе Kyiv Independent нашри хабар берди.
Воқеа ҳақида дастлаб Харьков вилояти губернатори Олег Синегубов хабар берган. Ўтган сутка давомида Харьков вилоятидаги 1775 нафар фуқаро Россиянинг минтақага янги ҳужумлари муносабати билан эвакуация қилинган.
Украина президенти Владимир Зеленский 10 май куни Россия Харьков вилоятида янги ҳужум амалиётларини бошлаганини билдирган эди. Харьков шаҳридан 30 километр шимолда жойлашган Украина—Россия чегарасида жанглар бошланиб кетгани хабар қилинган.
Бош прокуратурага кўра, Россия ҳужумлари оқибатида кун давомида ҳудудда 3 нафар тинч аҳоли вакили ҳалок бўлган, 4 нафари яраланган.
Харьков губернаторининг маълум қилишича, эвакуация қилинганларнинг кўпчилиги вилоят жануби-шарқида жойлашган Чугуэв туманидан бўлган. Фаол отишмалар бошланган ҳудуддан 1048 фуқаро олиб кетилган.
Қатор нашрлар рус қўшинлари чегарадаги тўртта аҳоли пунктини эгаллаганини билдирган. Харьков маъмурияти бу хабарларни рад этиб, жанглар давом этаётгани, ҳеч қандай ҳудуд йўқотилмаганини билдирган.
Украина Қуролли Кучлари Бош штаби 11 май куни тонгда Киев кучлари Харьков вилоятида русларнинг тўққизта йўналишдаги ҳужумини қайтарганини хабар қилган.
Изоҳ (0)