Toshkent viloyatida avtobusda ketayotgan ayolning “to‘lg‘og‘i tutib qolgani” yuzasidan ma’lumot berildi

“Toshshahartransxizmat” AJ Toshkent viloyati hududida harakatlanayotgan avtobusda yo‘lovchi ayolning to‘lg‘og‘i tutib qolgani yuzasidan tarqalgan xabarlarga munosabat bildirdi.

Ijtimoiy tarmoqlarda Saz Le-60 rusumli avtobus Toshkent viloyati hududida harakatlanayotgan vaqtda yo‘lovchi ayolning to‘lg‘og‘i tutib qolgani haqida xabarlar tarqaldi.

Qayd etilishicha, ijtimoiy tarmoqlarda aks etgan ushbu holat filmni tasvirga olish jarayonida amalga oshirilgan sahnalashtirilgan holat hisoblanadi.

2024-yil 16-mart kuni “Toshshahartransxizmat” AJ va S. Gerasimov nomidagi Butunrossiya davlat kinematografiya universiteti bilan tuzilgan mehnat shartnomasiga asosan, filmni suratga olish jarayoni uchun “1-avtobus saroyi” filialiga tegishli bo‘lgan Saz Le-60 rusumli avtobusi ajratilgan.

Filmni suratga olish jarayonida xavfsizlik choralari ko‘rilgan bo‘lib, hech bir fuqaro jabrlanmaganini maʼlum qilamiz. Ijtimoiy tarmoq faollaridan ushbu holatni noto‘g‘ri talqin qilmasliklarini so‘raymiz, — deyiladi munosabatda.

Eslatib o‘tamiz, 2020-yilda Toshkent shahar IIBB Post patrul xizmati brigadasi xodimlarining xizmat mashinasida chaqaloq dunyoga kelgandi.