Актёр Райан Гослинг The Wall Street Journal нашрига берган интервьюсида руҳий саломатлиги ва оиласи учун ваҳимали ва психологик жиҳатдан мураккаб роллардан воз кечишини айтди.
Мени ваҳший ёки салбий сифатда кўрсатадиган ролларни ўйнамасликка ҳаракат қиламан. Фильм образини танлашда асар қаҳрамонлари сўзларини уйда — оилам даврасида айтишимни тасаввур қиламан. Бу одат энг яхши ечимни топишга ёрдам беради, — деди актёр.
Актёр роль танлашда рафиқаси Ева Мендес билан ҳам маслаҳатлашишини қўшимча қилди:
Ва албатта, биринчи навбатда мен ва Ева оиламиз манфаатларини ҳисобга олган ҳолда қарор қабул қиламиз.
Гослингнинг сўзларига кўра, у шундай қоидалардан келиб чиққан ҳолда роль ижро этган биринчи фильм — бу Дэмьен Шазеллнинг “Ла Ла Ланд” (2016) мусиқий фильми бўлган.
Фильмда роль ўйнаш таклифи тушганда хаёлимга биринчи бўлиб икки қизим келди: “Мюзикл улар учун ҳам қизиқарли бўлади, чунки улар суратга тушмаса ҳам, биз ҳар куни пианино чалиб, рақсга тушишишимиз ва қўшиқ айтишимиз мумкин эди, — деди Райан Гослинг.
Актёр “Барби” (2023) фильмида суратга тушишида ҳам унинг қизлари илҳом берган:
Лойиҳага таклиф қилинганимда фарзандларим iPad’га ўз қўғирчоқлари ҳақида кичик видеолар олишни бошлаган вақтлар эди. Шунинг учун мазкур ролга иккиланмасдан рози бўлганман, — дея қўшимча қилди у.
Изоҳ (0)