Kuningiz barakali o‘tishi uchun yaxshi uyqu va foydali nonushtadan tashqari tetiklantiruvchi suv va sharbatlar ham yordam beradi. Tongda iste’mol qilsangiz, kun davomida energiya va kuch beradigan foydali ichimliklarni quyida keltirib o‘tamiz.
Iliq suv
Toza va sovuq bo‘lmagan suvni och qoringa ichish metabolizmni ishga tushirib, bosh og‘rishining oldini oladi hamda hazm jarayonini yaxshilaydi. Uning birorta qarshi ko‘rsatmalari mavjud emas. Aynan shu sabab ertalab bir stakan suv ichish tavsiya qilinadi.
Olma sirkasi qo‘shilgan suv
Oshqozon ichak traktini yaxshilaydigan, ishtaha va shirinlikka bo‘lgan moyillikni kamaytiradigan olma sirkasi vitamin hamda teri holatining yaxshilanishi uchun ahamiyatli bo‘lgan antioksidantlarning koni hisoblanadi. Ushbu mahsulotning o‘ziga xos xususiyatlarini yaxshi biladigan Viktoriya Bekhem kunini olma sirkasi bilan boshlashni odat qilgan. Sog‘lom bo‘lish uchun ikki osh qoshiq olma sirkasi qo‘shilgan suvni nonushtadan avval iste’mol qilishning o‘zi kifoya.
Limon sharbati qo‘shilgan suv
Limon sharbati yoki limonli suv ortiqcha vazndan aziyat chekayotganlar uchun ayni muddao. Tarkibidagi tabiiy kislotalar yog‘larni parchalaydi, C vitamini bisyor ekani hisobiga limon qo‘shilgan suv immunitetni mustahkamlab, shamollashning oldini oladi.
Zanjabilli suv
Kun davomida energiyaga to‘lib yurish va turli shamollashlarning oldini olish uchun ikki litr qaynoq suvga 3 osh qoshiq qirg‘ichdan chiqarilgan zanjabil ildizini qo‘shish mumkin. Tunda tayyorlab qo‘yilgan mazkur ichimlik bilan kunni boshlash kayfiyat yaxshi bo‘lishiga hissa qo‘shib, uyqu vaqtida paydo bo‘lgan shishlarni bartaraf qiladi.
Selderey sharbati
A, C va B guruhi vitaminlari, ruh, kaliy va fosforni o‘z ichiga oladigan mazkur ko‘katda, shuningdek, antioksidant va kletchatkalar ham bisyor bo‘ladi. Uning sharbati immunitetni mustahkamlaydi, teri holati va ichaklar faoliyatiga ijobiy ta’sir qiladi. Uning o‘zi achchiqlik qilsa, biroz sabzi sharbati qo‘shish tavsiya qilinadi.
Bodring suvi
Bodring suvi turli shishlardan xalos bo‘lishga va tanani toksinlardan tozalashga yordam beradigan tonik va ichimlikdir. Bodring suvi toksinlarni kamaytiradi va metabolizmni tezlashtiradi, ochlik tuyg‘usini kesadi. Ushbu ichimlik immunitet tizimini mustahkamlovchi ko‘plab vitaminlarni o‘z ichiga oladi. Bodring suvini tayyorlash oson. Buning uchun suvga maydalangan bodring qo‘shing, ta’bga ko‘ra ozgina limon sharbati qo‘shing va iste’mol qiling.
Izoh (0)