1990 йилларда Россияда туғилишнинг пастлиги, шунингдек, армия ва мудофаа саноатида юқори иш ҳақи туфайли юзага келган демографик инқироз Россия нефть ва газ компанияларида ишчи кучи етишмаслигига олиб келди. Бу ҳақда Bloomberg хабар берди.
Каsatkin Consulting маълумотларига кўра, жорий йилда Россия нефть ва газ саноатида 40 мингга яқин ходим етишмаяпти. Компаниялар нафақат малакали мутахассисларни, балки малакасиз ишчиларни ҳам қидириб, бўш иш ўринлари сонини сезиларли даражада оширган.
Энергия гигантлари юқори маош таклиф қиладиган ҳарбий ва мудофаа компаниялари билан кадрлар учун рақобатлашишга мажбур.
“Кадрлар етишмовчилиги Россия иқтисодиётининг барча тармоқларига таъсир кўрсатмоқда”, — деб таъкидлайди Россия Марказий банки.
Нашрнинг қайд этишича, январь—февраль ойларида нефть ва газ соҳасида ўртача иш ҳақи ойига қарийб 125,2 минг рублни (1340 доллар) ташкил этган, бу армия маошидан ҳам паст.
Энергетика компаниялари бўш иш ўринларини тўлдириш учун пенсия ёшидаги одамларни ёллашга мажбур. Кадрлар тақчиллиги муаммоси Россия учун янгилик эмас, аммо Россия—Украина уруши уни жиддий равишда кучайтирган. Уруш бошланганидан бери собиқ СССР давлатларидан Россияга меҳнат муҳожирлари оқими 4 баробар камайган.
Росстат маълумотларига кўра, 2023 йилда 1,86 миллион ишчига эҳтиёж мавжуд бўлган бир вақтда хорижлик ишчиларнинг соф оқими бор-йўғи 110 минг кишини ташкил этган.
Изоҳ (0)