1990-yillarda Rossiyada tug‘ilishning pastligi, shuningdek, armiya va mudofaa sanoatida yuqori ish haqi tufayli yuzaga kelgan demografik inqiroz Rossiya neft va gaz kompaniyalarida ishchi kuchi yetishmasligiga olib keldi. Bu haqda Bloomberg xabar berdi.
Kasatkin Consulting ma’lumotlariga ko‘ra, joriy yilda Rossiya neft va gaz sanoatida 40 mingga yaqin xodim yetishmayapti. Kompaniyalar nafaqat malakali mutaxassislarni, balki malakasiz ishchilarni ham qidirib, bo‘sh ish o‘rinlari sonini sezilarli darajada oshirgan.
Energiya gigantlari yuqori maosh taklif qiladigan harbiy va mudofaa kompaniyalari bilan kadrlar uchun raqobatlashishga majbur.
“Kadrlar yetishmovchiligi Rossiya iqtisodiyotining barcha tarmoqlariga ta’sir ko‘rsatmoqda”, — deb ta’kidlaydi Rossiya Markaziy banki.
Nashrning qayd etishicha, yanvar—fevral oylarida neft va gaz sohasida o‘rtacha ish haqi oyiga qariyb 125,2 ming rublni (1340 dollar) tashkil etgan, bu armiya maoshidan ham past.
Energetika kompaniyalari bo‘sh ish o‘rinlarini to‘ldirish uchun pensiya yoshidagi odamlarni yollashga majbur. Kadrlar taqchilligi muammosi Rossiya uchun yangilik emas, ammo Rossiya—Ukraina urushi uni jiddiy ravishda kuchaytirgan. Urush boshlanganidan beri sobiq SSSR davlatlaridan Rossiyaga mehnat muhojirlari oqimi 4 barobar kamaygan.
Rosstat ma’lumotlariga ko‘ra, 2023-yilda 1,86 million ishchiga ehtiyoj mavjud bo‘lgan bir vaqtda xorijlik ishchilarning sof oqimi bor-yo‘g‘i 110 ming kishini tashkil etgan.
Izoh (0)