Тошкент шаҳрида бўлиб ўтаётган Халқаро инвестиция форумининг биринчи кунидан ўндан ортиқ инвестиция ва савдо битимларини имзоланди. Шуни алоҳида таъкидлаб ўтиш керакки, инвесторларнинг географияси кенгайиб бормоқда. “Дарё” уларнинг баъзиларига алоҳида тўхталиб ўтди.
Уч вилоятда араблар
Ўзбекистонда бир нечта электр станциялар қуриб келаётган Бирлашган Араб Амирликларининг Masdar компанияси форум давомида Самарқанд, Жиззах ва Навоий вилоятларида энергия сақлаш тизимларини қуриш (электр энергиясини сотиб олиш) бўйича “Ўзбекистон миллий электр тармоқлари” акциядорлик жамияти билан битим имзолади.
Тошкент шаҳар Яшнобод туманида кўп тармоқли шифохонани лойиҳалаш, қуриш, жиҳозлаш, молиялаштириш ва бошқариш тўғрисида — Соғлиқни сақлаш вазирлиги ҳамда Inter Health Medical компанияси ўртасида қўшма ҳамкорлик шартномаси имзоланди.
“Учқулоч”да турклар
Кончилик ва геология соҳасидаги 8 та истиқболли йўналиш бўйича — Тоғ-кон саноати ва геология вазирлиги, Ўзбекистон Республикаси тикланиш ва тараққиёт жамғармаси ҳамда Schlumberger Oil and Gas Technologies B.V ўртасида ўзаро англашув меморандуми имзоланди.
“Олмалиқ кон-металлургия комбинати” АЖ эса “Учқулоч” кони майдонида геологик қидирув ишларини ташкил этиш бўйича Esan Eczacibasi (Туркия) компанияси билан шартнома имзолади.
Лавлагидан экспортгача
Форум иши қишлоқ хўжалиги учун ҳам омадли бўлди. Жумладан, қишлоқ хўжалиги маҳсулотларини етиштириш, қайта ишлаш, сақлаш ва экспорт қилишга ихтисослашган агрокомплекс ташкил этиш бўйича — Сирдарё вилояти хокимлиги ҳамда Minessi A.S (Туркия) меморандумга эришди.
Қишлоқ хўжалиги вазирлиги эса Nile Sugar компанияси билан қанд лавлаги етиштириш ва шакар ишлаб чиқариш бўйича ҳамкорлик қиладиган бўлди
Ширинда испанлар
Испаниянинг Almar Water Solutions компанияси Самарқанд вилоятидаги Ширин шаҳарчасида ичимлик ва оқова сув иншоотини қурилишидаги асосий шартларни келишиш бўйича “Ўзсувтаъминот” АЖ билан бир қарорга келди.
Янги Тошкент хитойликлар
Кўлами жиҳатидан йирик ҳисобланган Янги Тошкентни барпо этиш лойиҳасига инвесторлар катта қизиқиш билан қарамоқда. Булар орасида Chine State Construction Engineering Corporation International Construction компанияси янги шаҳарда инновацион ва барқарор маълумотлар марказларини ташкил этиш бўйича ишлайдиган бўлди.
Янги Тошкент шаҳар инфратузилмасини қуришда эса Data Volt Information Technology компанияси ҳам ўз ҳиссасини қўшадиган бўлди.
Изоҳ (0)