29 апрель куни Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитага Қувайт Давлати Миллий кенгаши дўстлик қўмитаси раиси Сауд Нашми ал-Хорижий бошчилигидаги делегация ташриф буюрди. Бу ҳақда қўмита расмий сайтида хабар берилди.
Меҳмонларни Дин ишлари бўйича қўмита раиси О. Юсупов қабул қилди.
О. Юсупов меҳмонларни Ўзбекистонга ташрифи билан қутлаб, Дин ишлари бўйича қўмита фаолияти, Республикадаги диний вазият, амалга оширилаётган ислоҳотлар хусусида қисқача маълумот берди.
Сауд Нашми ал-Хорижий Ўзбекистонга ташрифидан жуда мамнун эканини маълум қилиб, Қувайт халқи, ҳукумати ҳамда Миллий кенгаши номидан Ўзбекистонга таклиф этилганлиги учун миннатдорчилик билдирди. Меҳмон Қувайт Давлатининг Ўзбекистон мустақиллигини тан олган биринчи давлатлардан бўлганлигини маълум қилиб, ўзаро муносабатларга юқори эътибор билан қаралишини таъкидлаб ўтди.
Меҳмон Қувайтдаги кўпгина жамғармалар Ўзбекистон билан алоқада эканлигини маълум қилиб, кўп йиллардан бери Ўзбекистонда фаолият олиб бораётган Қувайт халқаро хайрия жамғармасини мисол қилиб кўрсатди. Сўзининг охирида Сауд Нашми ал-Хорижий мазкур ташрифдан асосий мақсад ҳам айнан икки давлат ўртасидаги алоқаларни янада мустаҳкамлашга қаратилганлигини маълум қилди.
О. Юсупов билдирилган фикрлар учун миннатдорчилик билдириб, диний соҳада ҳам Қувайт Давлатининг Тошкент шаҳридаги элчихонаси билан доимий мулоқотда бўлиниб келинаётганлигини таъкидлаб ўтди.
Учрашув сўнгида икки томон барқарор давом этаётган ҳамкорлик йўлини янада мустаҳкамлаш ва ривожлантиришга тайёр эканлигини таъкидлади.
Учрашув самимий ва дўстона муҳитда ўтди.
Изоҳ (0)