Исроил пойтахти Тель-Авивда 2 май куни мамлакат фуқаролари ҳукуматдан ҲАМАС билан келишувга рози бўлишни талаб қилиб, намойиш уюштирди. Бу ҳақда Anadolu нашри хабар берди.
Манбада айтилишича, Исроил ҳукумати ҲАМАС билан ўт очишни тўхтатиш ҳақидаги келишув лойиҳасини кўриб чиқаётганини эълон қилиши ортидан мамлакат пойтахтида намойишлар бошланиб кетган. Аҳоли ўз расмийларидан тинчлик келишувини тезлаштиришни талаб қилган.
Бир қанча Исроил манбалари намойишчиларнинг катта қисми Ғазо секторида асирга олинган Исроил аскарларининг оила аъзолари ва қариндошларидан иборат эканини билдирган. Намойишчилар кўтариб чиққан шиорларда ҳам асирликдаги аскарларни қайтариш қаттиқ даъват қилинади.
Намойишчилар Тель-Авивнинг Аялон шоссесини икки йўналишда тўсиб қўйгани хабар қилинган. “Ё Рафаҳ, ёки гаровга олинганлар — ҳаётни танла” деб ёзилган баннерлар йўл бўйларига илиб чиқилган.
Аҳоли ҲАМАС шартларини қабул қилиш эвазига ўз яқинларини қайтаришни истаётгани айтилган. Ҳозирга қадар намойишлар бўлаётган ҳудудда бир аёл ва яна бир эркак ҳибсга олингани айтилган.
Олдинроқ Исроил бош вазири Биньямин Нетаньяху 1,4 миллиондан ортиқ кўчирилган фаластинликлар истиқомат қиладиган Рафаҳга ҳужум қилинишини айтган эди. Бу ҳужум борасида ҲАМАС билан ҳеч қандай музокара ўтказилмаслиги айтилган.
130 дан ортиқ исроилликни гаровда ушлаб тургани айтилаётган ҲАМАС Тель-Авив билан асирга олинганлар бўйича келишув эвазига Исроилнинг Ғазо секторидаги ҳалокатли ҳужумини тўхтатишни талаб қилмоқда.
Маълумотларга кўра, оммавий вайронагарчилик ва зарурий маҳсулотларнинг кескин танқислиги оқибатида Ғазо секторида ҳозирга қадар 34 600 нафарга яқин фаластинликлар, асосан аёллар ва болалар ҳалок бўлган. Минглаб одамлар яраланган.
Изоҳ (0)