Isroil poytaxti Tel-Avivda 2-may kuni mamlakat fuqarolari hukumatdan HAMAS bilan kelishuvga rozi bo‘lishni talab qilib, namoyish uyushtirdi. Bu haqda Anadolu nashri xabar berdi.
Manbada aytilishicha, Isroil hukumati HAMAS bilan o‘t ochishni to‘xtatish haqidagi kelishuv loyihasini ko‘rib chiqayotganini eʼlon qilishi ortidan mamlakat poytaxtida namoyishlar boshlanib ketgan. Aholi o‘z rasmiylaridan tinchlik kelishuvini tezlashtirishni talab qilgan.
Bir qancha Isroil manbalari namoyishchilarning katta qismi G‘azo sektorida asirga olingan Isroil askarlarining oila aʼzolari va qarindoshlaridan iborat ekanini bildirgan. Namoyishchilar ko‘tarib chiqqan shiorlarda ham asirlikdagi askarlarni qaytarish qattiq daʼvat qilinadi.
Namoyishchilar Tel-Avivning Ayalon shossesini ikki yo‘nalishda to‘sib qo‘ygani xabar qilingan. “Yo Rafah, yoki garovga olinganlar — hayotni tanla” deb yozilgan bannerlar yo‘l bo‘ylariga ilib chiqilgan.
Aholi HAMAS shartlarini qabul qilish evaziga o‘z yaqinlarini qaytarishni istayotgani aytilgan. Hozirga qadar namoyishlar bo‘layotgan hududda bir ayol va yana bir erkak hibsga olingani aytilgan.
Oldinroq Isroil bosh vaziri Binyamin Netanyaxu 1,4 milliondan ortiq ko‘chirilgan falastinliklar istiqomat qiladigan Rafahga hujum qilinishini aytgan edi. Bu hujum borasida HAMAS bilan hech qanday muzokara o‘tkazilmasligi aytilgan.
130 dan ortiq isroillikni garovda ushlab turgani aytilayotgan HAMAS Tel-Aviv bilan asirga olinganlar bo‘yicha kelishuv evaziga Isroilning G‘azo sektoridagi halokatli hujumini to‘xtatishni talab qilmoqda.
Maʼlumotlarga ko‘ra, ommaviy vayronagarchilik va zaruriy mahsulotlarning keskin tanqisligi oqibatida G‘azo sektorida hozirga qadar 34 600 nafarga yaqin falastinliklar, asosan ayollar va bolalar halok bo‘lgan. Minglab odamlar yaralangan.
Izoh (0)