“Янги Ўзбекистон” университети талабалари дунёнинг биринчи рақамли олийгоҳида амалиёт ўтайди

“Янги Ўзбекистон” университети талабалари дунёнинг 1-рақамли олийгоҳида амалиёт ўташ ва малака ошириш имконига эга бўлади. Бу ҳақда олийгоҳ матбуот хизмати хабар берди.

Маълум қилинишича, мактабгача ва мактаб таълими вазири Ҳилола Умарова MIT J-WEL билан ҳамкорлик алоқаларини янада кенгайтириш бўйича музокаралар ўтказди. “Янги Ўзбекистон” университети MIT J-WEL’нинг Марказий Осиёдаги энг яқин стратегик ҳамкори сифатида эътироф этилди.

Массачусеттс технология институти J-WEL ва “Янги Ўзбекистон” университети ўртасида имзоланган келишувга кўра, талабалар MIT профессор-ўқитувчилари томонидан ташкил этиладиган дарсларда иштирок этиши, илмий тадқиқотлар олиб боришлари, ўз лойиҳаларини янада ривожлантиришлари ва MIT лабораторияларида экспериментлар ўтказишлари мумкин бўлади.

Талабалар MITда таҳсил оладиган тенгдошлари билан яқин алоқалар ўрнатиб, доимий тажриба алмашиб боради.

Таъкидланишича, дунёнинг энг етакчи университети тажрибасига эга бўлиш талабаларнинг келажакда энг кучлилар қаторида бўлишини таъминлайди.