“Yangi O‘zbekiston” universiteti talabalari dunyoning birinchi raqamli oliygohida amaliyot o‘taydi

“Yangi O‘zbekiston” universiteti talabalari dunyoning 1-raqamli oliygohida amaliyot o‘tash va malaka oshirish imkoniga ega bo‘ladi. Bu haqda oliygoh matbuot xizmati xabar berdi.

Ma’lum qilinishicha, maktabgacha va maktab ta’limi vaziri Hilola Umarova MIT J-Wel bilan hamkorlik aloqalarini yanada kengaytirish bo‘yicha muzokaralar o‘tkazdi. “Yangi O‘zbekiston” universiteti MIT J-Wel’ning Markaziy Osiyodagi eng yaqin strategik hamkori sifatida e’tirof etildi.

Massachusetts texnologiya instituti J-WEL va “Yangi O‘zbekiston” universiteti o‘rtasida imzolangan kelishuvga ko‘ra, talabalar MIT professor-o‘qituvchilari tomonidan tashkil etiladigan darslarda ishtirok etishi, ilmiy tadqiqotlar olib borishlari, o‘z loyihalarini yanada rivojlantirishlari va MIT laboratoriyalarida eksperimentlar o‘tkazishlari mumkin bo‘ladi.

Talabalar MITda tahsil oladigan tengdoshlari bilan yaqin aloqalar o‘rnatib, doimiy tajriba almashib boradi.

Ta’kidlanishicha, dunyoning eng yetakchi universiteti tajribasiga ega bo‘lish talabalarning kelajakda eng kuchlilar qatorida bo‘lishini ta’minlaydi.