Агар мутасаддилар жиддий эътибор қаратмаса, терак ва қайрағоч каби дарахтларимиз жиддий хавф остида қолади. Бу ҳақда Ўзбекистон Экологик партияси раиси, биолог олим Абдушукур Ҳамзаев маълум қилди.
Олимнинг маълум қилишича, зараркунанда ҳашаротлар туфайли тераклар жиддий хавф остида.
Мен куни кеча Тошкент шаҳридан Сурхондарё вилояти (Сариосиё тумани)гача бўлган ҳудуддаги М-39 йўли бўйлаб экилган дарахтлар ҳолатини кўздан кечирдим.
Айниқса, Тошкент вилоятидан Қашқадарё вилоятининг Кўкдала тумани ҳудудигача бўлган йўл бўйларида экилган тераклар (асосан четдан келтирилган турлари)даги ҳолат жуда ёмон.
Апрель ойи якунига етмасдан бу тераклар куз рангига бўялган. Албатта бу табиий ҳодиса эмас, зараркунандалар таъсирида тераклар мана шундай кўринишга келган. Бу зараркунандалар сўнгги 2-3 йилда кескин кўпайди. Агар мутасаддилар жиддий эътибор қаратмаса терак ва қайрағоч каби дарахтларимиз жиддий хавф остида қолади, — деди Экологик партия раиси.
Аввалроқ, иқлимшунос Эркин Абдулаҳатов 2024 йилда қишлоқ хўжалиги ноодатий зараркунандалар хавфи билан курашишига тўқнаш келиши мумкинлигини айтиб ўтганди.
Изоҳ (0)