АҚШда ўқиётган ўзбекистонлик талабалар сони минг нафардан ошди, деб хабар бермоқда АҚШнинг Ўзбекистондаги элчихонаси матбуот хизмати.
Халқаро таълим алмашинуви бўйича 2023 йилги “Очиқ эшиклар” (Open doors) ҳисоботига кўра, 2022/2023-ўқув йилида АҚШда таълим олаётган ўзбекистонлик талабалар сони 1000 нафардан ошган. Бу ўзига хос янги рекорд бўлиб, кўрсаткич ўтган ўқув йилига нисбатан 72,6 фоизга ўсган.
Ҳисоботда айтилишича, 2021/2022-ўқув йилида 631 нафар ўзбекистонлик талаба АҚШ олий таълим муассасаларида таҳсил олган бўлса, 2022/2023-ўқув йилига келиб, у ерда ўқиётган ўзбекистонликлар сони 1089 нафарни ташкил этган.
Буларнинг:
- 57,2 фоизи бакалавриат босқичига қабул қилинган,
- 29,9 фоизи магистратура босқичида ўқиган,
- 7,9 фоизи факультатив амалий машғулотларда қатнашган,
- 5 фоизи эса инглиз тили ёки бошқа қисқа муддатли таълим дастурларига ўқишга кирган.
Ҳисоботга кўра, ўтган ўқув йилида АҚШдаги халқаро талабалар сони 1 миллиондан ошиб, ўтган йилга нисбатан 14 фоизга ўсган ва янги юқори кўрсаткич 1,057,188 талабани ташкил этган.
Халқаро таълим институти (IIE) ва АҚШ давлат департаментининг Таълим ва маданият масалалари бюроси (ECА) томонидан тузилган “Очиқ эшиклар 2023” дастури АҚШ халқаро талабалар учун энг яхши манзил бўлиб қолаётганини таъкидлайди. Қўшма Штатларнинг олий таълим соҳасидаги глобал етакчилигини эътироф этишда давом этаётган бу талабалар Америкага дунёнинг деярли барча давлатларидан келади.
2021/2022-ўқув йилида 188 753 нафар америкалик талаба чет элда таҳсил олган бўлиб, бу ўтган йилга нисбатан 13 баравар кўп ва пандемиядан олдинги даражанинг ярмидан кўпроғини ташкил этади.
2023 йилги “Очиқ эшиклар” ҳисоботи ҳақида батафсил маълумотни қуйидаги ҳавола орқали кўриш мумкин: IIE Open Doors (opendoorsdata.org)
Изоҳ (0)