Тошкент вилоятида электр энергиясидан ўғринча фойдаланган 17 та ноқонуний майнер фаолиятига чек қўйилди, деб хабар беради “Ўзэнергоинспекция” матбуот хизмати.
Қайд этилишича, Давлат хавфсизлик хизмати, “Ўзэнергоинспекция” ва Иқтисодий жиноятларга қарши курашиш департаменти билан ҳамкорликда Тошкент вилоятида 2024 йилнинг биринчи чорагида ўтказилган назорат тадбирлари давомида крипто-актив ва майнинг фаолияти бўйича 17 та ҳолат аниқланган.
Унга кўра, майнинг фермалар томонидан электр энергиясидан ноқонуний фойдаланганлик натижасида давлат манфаатларига жами 16 миллиард 553 миллион сўм зарар етказилгани маълум бўлган.
Мисол учун, Паркент туманида истиқомат қилувчи фуқаро П.О. га қарашли дала ҳовлида майнинг қурилмаларни ўзбошимчалик билан электр тармоғига уланиши натижасида, давлат манфаатларига 3 миллиард 476 миллион сўм миқдорида зарар етказган.
Бу каби ҳолат Янгийўл шаҳрида истиқомат қилувчи фуқаро I.Н. га қарашли хонадонда ҳам ҳеч қандай рухсатномасиз майнинг фаолияти билан шуғулланиб, 1 миллиард 19 миллион сўмлик электр энергиясини талон-торож қилгани аниқланди.
Мазкур ҳолатлар юзасидан Жиноят кодексининг тегишли моддалари асосан тергов ҳаракатларига ўтказилмоқда.
Аввалроқ пойтахтда электр энергиясига ноқонуний тарзда уланиб, 1,5 миллиард сўмлик зарар етказган майнинг ферма аниқлангани тўғрисида хабар берилганди. Шунингдек, Жиззахда иккита майнинг ферма давлатга салкам ярим миллиард сўм зарар етказгани маълум бўлган эди.
Изоҳ (0)