Ижтимоий тармоқларда Ўзбекистон халқ артисти, 77 ёшли Шерали Жўраевнинг вафот этгани тўғрисида турли миш-мишлар тарқалди.
Хусусан, “Sayyod.com” асосчиси Сардор Комилов ўз саҳифасида бу ҳақда ёзиб қолдирди. Бундан ташқари, Аброр Мухтор Али ҳам саҳифасида таъзия билдирди ва оиласига сабр тилади.
Шундан сўнг “Ўзбекконцерт” давлат муассасаси Шерали Жўраевнинг вафотини тасдиқлаб, таъзия билдирди.
Шерали Жўраев 50 йилдан зиёд ижоди давомида “Ўзбегим”, “Соҳибқирон”, “Эгаси бор юрт”, “Карвон”, “Сарбон”, “Инсон қасидаси” каби 600 га яқин қўшиқ яратган. Унинг “Биринчи муҳаббатим”, “Ёшлигимиз”, “Ой юзингга”, “Ошиқлар сардори”, “Дўст бўлсанг, ёнимда тур” каби ашулалари халқ қўшиқларига айланиб кетган. Хонанда мумтоз шоирлар ғазалларини куйга солиб, ўзбек халқи меросини ёш авлодга ва жаҳонга танитишга улкан ҳисса қўшган. Шерали Жўраев 1981 йилда “Ўзбекистонда хизмат кўрсатган артист”, 1987 йилда “Ўзбекистон халқ артисти” фахрий унвонлари, 2018 йилда “Фидокорона хизматлари учун” орденига сазовор бўлган. 2022 йилда эса “Эл-юрт ҳурмати” ордени билан мукофотланган.
Шавкат Мирзиёев 2022 йил Шерали Жўраевга туғилган куни муносабати билан табрик йўллаган. “Эл-юртимиз сизни бутун ҳаётини ўзбек маданияти ва санъатини ривожлантиришга бағишлаган, ўз ижодий мактабини яратган улкан ва бетакрор истеъдод эгаси, фидойи ва миллатпарвар шахс сифатида яхши билади ва юксак қадрлайди”, дейилади табрикда.
Шерали Жўраев ҳақида
Шерали Жўраев 1947 йилда Андижон вилоятининг Асака шаҳрида туғилган. 1971 йилда Тошкент театр ва рассомчилик институтининг актёрлик санъати йўналишини тамомлаган.
Меҳнат фаолиятини 1972 йилда “Шодлик” ашула ва рақс ансамблида хонанда сифатида бошлаган. Шунингдек, 1979—1986 йилларда Андижон вилояти филармонияси хонандаси, 1986—1996 йилларда Ўзбекистон давлат филармонияси хонандаси, 1996—2017 йилларда “Ўзбекнаво” эстрада бирлашмаси хонандаси, 2017 йилдан шу кунга қадар “Ўзбекконцерт” давлат муассасаси хонандаси сифатида самарали ижод қилиб келаётганди.
Буюк ҳофиз ижодий фаолияти давомида юзлаб қўшиқлар яратди, Шерали Жўраев ижод мактабига асос солди, юзлаб шогирдлар чиқарди. 1981 йилда “Ўзбекистонда хизмат кўрсатган артист” фахрий унвони билан, 1987 йилда “Ўзбекистон халқ артисти” фахрий унвони билан, 1991 йилда А.Навоий номидаги Ўзбекистон Республикаси давлат мукофоти билан, 2018 йилда “Тожикистон халқ артисти” фахрий унвони билан, 2018 йилда “Фидокорона хизматлари учун” ордени ва 2022 йилда “Эл-юрт ҳурмати” ордени билан мукофотланди.
“Нега исмим Алишер эмас?”
Истеъдодли ижодкор Шерали Жўраев ҳам барча қишлоқ болалари сингари мактаб ёшидан бошлаб чорва молларини боққан. Аммо у бошқа тенгдошларидан фарқли равишда адабиётга, хусусан, Алишер Навоий шеъриятига меҳр қўяди. Ижодкорга бўлган меҳри кучли бўлгани учун ҳам “Нега исмимни Алишер деб қўймагансизлар?” деган саволни кўп бергани ҳақида интервьюларида айтиб ўтган.
“Аслида спортчи бўлмоқчи эдим”
Хонандани кўпчилик болалигидан санъатга қизиққан ва мусиқа мактабларида таҳсил олган деб билади. Аммо у шунчаки тасодиф ва тақдирнинг инояти билан санъаткор бўлган. Боиси у болаликдан боксга қизиққан ва 63 кг вазнли спортчи ҳисобланган. Ота-онасининг оқ фотиҳасини олиб, Тошкентдаги жисмоний тарбия институтига ҳужжат топширгани келади. Аммо “йўлдан адашиш” унинг қарорини ўзгартиради.
Фото: Instagram
— Санъаткор бўлиш хаёлимга ҳам келмаган. Барча абитуриентлар каби ижара уйга жойлашганмиз. Улардан жисмоний тарбия институтининг қаерда жойлашганини сўрасам, Чорсудаги “Жанггоҳ” маҳалласи яқинида жойлашган “Спартак” стадионидан сўрашимни айтишди.
Тошкентни билмайман, автобусга ўтириб, “Жанггоҳ” маҳалласига келдим. Аммо худди мени кимдир Ҳасти Имом томонга етаклагандек бўлди. Менимча, тақдири азалда битилгани шу бўлса керак. Йўлда кетаётсам, дутор ва доиранинг расми туширилган бинога кўзим тушди. Иккинчи қаватида бир йигит пианино чалиб ўтирган экан. У билан танишиб, “Овозинг зўр экан” деганидан кейин, маданий-оқартув техникумига ўқишга кирганман, — деган Шерали Жўраев.
“Отам санъаткор бўлишимга қарши бўлган”
Андижондаги ота-она фарзандининг бу техникумга кирганидан бехабар эди. Ҳали қайси соҳа вакили бўлишини тўлиқ англаб етмаган, аммо ширали овози билан барча устозларнинг меҳрини қозонган Шерали Жўраевга филармонияда ўқишни таклиф қилишади. Маданий-оқартув техникумини билган бўлажак ижодкор ўша куниёқ хонанда бўлишга жиддий аҳд қилиб, ўқишни филармонияда давом эттиради.
Фото: Instagram
— Падари бузрукворим Нурмуҳаммад ота санъатга, боболаримиз меросига иштиёқманд инсон эдилар. Ҳазрат Навоийнинг китобларини ўқиб, бизга мағзини чақиб берардилар. Далада қўй боққани чиққанимизда отам отга миниб олар, мен орқаларидан мингашиб борардим. Шунда “Қаро кўзум”ни хиргойи қилганларида беихтиёр кўзларимга ёш келарди. Мен ҳам ана шундай чиройли қўшиқ айта олармиканман, деб ўйлардим. Аммо отам раҳматли қўшиқчи бўлишимга бошида қаттиқ қаршилик қилганлар, — деган ижодкор.
15 йиллик сирли “запрет”
Фото: Instagram / @sheralijuraevofficial
Шерали Жўраев ижодини таърифлашнинг ҳожати йўқ. Чунки у бир санъаткор эришиши мумкин бўлган барча муваффақиятларга эришган. Аммо қандайдир сабабларга кўра 2002 йилдан у оммага кўринмай қолди. Буни айримлар “зарпет”лар билан боғлашди. Аммо хонанданинг ўзи бунинг сабаблари ҳақида очиқ маълумот бермайди. 2017 йили яна оммага кўриниш берди ва ўша йилдан буён катта саройда концерт бериб келади.
Биринчи президент билан ҳажга борган
Халқ орасида ҳофиз Ўзбекистон Республикасининг Биринчи президенти билан Каъбатуллоҳнинг ичига киргани ҳақидаги гаплар тарқалганди. Шерали Жўраев бу гапларга ҳам ойдинлик киритиб ўтган.
Фото: Instagram / @sheralijuraevofficial
— Марҳум юртбошимиз билан Маккада муборак Каъбатуллоҳнинг ичига кирганимиз асло эсимдан чиқмайди. Биринчи президентимиз бутун ҳаётини шу халқ, ватан учун бахшида қилди. У кишининг жуда кўп хислатлари, фазилатларига гувоҳ бўлганман. Инсоннинг қандайлигини бир қарашда билардилар. Ҳамиша узоқни кўзлаб, ақл-заковат билан иш тутдилар. Жойлари жаннатда бўлсин, — дейди ҳофиз журналист Рустам Жабборовга берган интервьюсида.
Изоҳ (0)