12-aprel kuni Sherali Jo‘rayev xonadonida marhum hofizning tavallud kuni munosabati bilan farzandlari tomonidan ehson dasturxoni yozildi. Ushbu tadbirga Sherali Jo‘rayevning san’at olamidagi yaqin do‘stlari hamda qarindosh-urug‘lari, muxlislari tashrif buyurdi. Xotira kechasida marhum hofizning to‘ng‘ich farzandi Shohjahon Jo‘rayev “Daryo” muxbiri bilan muloqotda bo‘lib, otasining qo‘shiqlariga nisbatan qo‘llanilayotgan mualliflik huquqi haqida so‘zlab berdi.
— Bu dunyo shunaqa ekan: kimgadir yoqasan, kimgadir yoqmaysan. Otamiz tirik paytlarida biz bilan do‘st bo‘lib, ular o‘tganlaridan keyin bizdan yuz o‘girganlar juda ko‘p bo‘ldi. Ularning ichida taniqlilari ham talaygina. Ular sodda xalqimizdan shunday foydalanishyaptiki, go‘yoki biz otamning qo‘shiqlarini hech kimga ayttirmayotgandek ko‘rsatib qo‘yishyapti. Vaholanki bu narsa bizning qo‘limizda emas. Buni otam tiriklik vaqtida shartnoma qildirib, mualliflik huquqidan o‘tkazdirib olgan. Biz o‘zimizcha bir narsa qilishga haqqimiz yo‘q. Bu u kishining xohishlari edi. O‘zbekistonda 12 ta viloyat bo‘lsa, yuzlab mahallalar bor. Har bir mahallaning o‘z “Sheralisi” bor. O‘sha mahallada kimdir to‘y qilsa, o‘shani chaqirib kelinglar, o‘sha Sheraliga o‘xshaydi-da, deyishadi. Shartnomada nomi chiqmagan, havaskor, Sheralining qo‘shiqlarini kuylab, non topayotganlar bemalol aytaverishsin. Lekin tanilib qolganlar, unvon olganlar, puli borlar va yangi bir qo‘shiq yarata oladiganlar Sheralining qo‘shiqlariga osilmasin. Ular o‘zlari qo‘shiq qilsin, mehnat va ijod qilsin, tayyoriga ayyor bo‘lishmasin, deganlar otam.
— Shartnomada otamning qo‘shiqlarini davlat tadbirlarida, konsert va telekanallarda, radiolarda har ko‘yga solib aytilmasin, deb ko‘rsatilgan. Agar shunday holat kuzatiladigan bo‘lsa, nafaqat ijro qilgan odam, balki ko‘rsatuv mualliflariga ham yaxshi bo‘lmaydi. Buni bizga mualliflik huquqini himoya qiluvchi UzAvtor agentligi vakillari tushuntirdi. O‘zining mualliflik qo‘shig‘i bo‘lmagan, muqim ijod qilmagan, boshqalarning qo‘shig‘ini aytib tirikchilik qilib kelganlar bundan keyin ham otamning qo‘shig‘ini aytaversin. Chunki ular bu qo‘shiqlarni televizorga chiqib tanilish maqsadida aytmaydi. Lekin puli bor, to‘yga falon dollarga chiqadigan xonandalar, O‘zbekistonda xizmat ko‘rsatgan, xalq artisti unvonini olgan san’atkorlar, o‘zingiz mehnat qiling, o‘zingiz ijod qiling va bizga meros bo‘lib o‘tgan qo‘shiqlarga osilmang! Qo‘shiqlarni buzib, pachaqlab yuboryapsiz. Men Sherali Jo‘rayev qo‘shiqlarining qorovuliman. To‘g‘ri tushuninglar! Men Sherali Jo‘rayevning maktabiga qorovulman. Bu butun dunyoda bor narsa. Hatto konstitutsiyaning 53-moddasiga ham kiritildi. Ya’ni endi har bir ijodkorning ijod mahsuli endi mualliflik huquqi asosida himoyalanadi, deb aytilyapti. Nega endi shu qonunlarning hammasiga biz qarshi chiqishimiz kerak?
Shohjahon Jo‘rayev bilan intervyuni to‘liq quyida tomosha qilishingiz mumkin:
Izoh (0)