Европа Иттифоқи томонидан Ўзбекистонга 6 миллион евро маблағ ажратилди. Бу ҳақда ЕИнинг мамлакатдаги делегацияси маълум қилди.
Мазкур маблағ мамлакатга қишлоқ хўжалиги соҳасида ислоҳотлар олиб борилишини рағбатлантириш ва макроиқтисодий барқарорликни сақлаб қолишда яхши натижалар кўрсатгани учун тақдим этилган.
Европа Иттифоқи ва Ўзбекистон ҳукумати ўртасидаги келишувга кўра, 2020−2030 йилларга мўлжалланган Миллий Қишлоқ хўжалигини ривожлантириш стратегияси амалини қўллаб-қувватлашга жами 20 миллион евро ажратилиши кўзда тутилган. Жорий ва келгуси йилда ҳам қўшимча грантлар кутилмоқда.
Деҳқон хўжаликларининг ривожланиши, ўзгарувчан иқлим шароитига мослашиши, атроф-муҳитни муҳофаза қилиши ҳамда маҳаллий ва глобал қиймат занжирининг бир қисмига айланишига имкон берувчи ислоҳотларга эътибор қаратмоқдамиз. Маблағлар ЕИнинг GSP+ каби бошқа ташаббуслари билан бирга, Европа Иттифоқига экспорт ҳажмини оширишга ёрдам беради, — дейди Европа Иттифоқининг Ўзбекистондаги элчиси Шарлотта Адриан.
Барқарор қишлоқ озиқ-овқат сектори Европа Иттифоқининг Ўзбекистон учун узоқ муддатли индикатив дастурининг (2021−2027 йиллар) 3 та стратегик устувор йўналишларидан бири ҳисобланади. Бошқа устувор йўналишлар яхши бошқарув ва инклюзивлик ҳамда экологик ва рақамли ўсишлардан иборат. Дастур доирасида 2021 йилдан буён мамлакатга деярли 76 миллион евро ажратилган.
Ўзбекистонда 2023 йилнинг биринчи ярим йиллигида халқаро молия институтлари ва хорижий ҳукумат молия ташкилотлари билан 17 та лойиҳа доирасида умумий қиймати 2,3 миллиард долларлик қарз битимлари имзоланганди.
Изоҳ (0)