Ғазо жанубидаги Хон Юнис шаҳри Носир касалхонасидаги оммавий қабрдан топилган жасадлар сони 400 га яқинлашди. Исроил кучлари тиббиёт муассасасини тарк этгач, бино ҳовлисидан жасадлар топила бошланган. Бу ҳақда WAFA хабар берди.
Исроил қўшинлари Хон Юнис шаҳридан олиб чиқиб кетилганидан сўнг Носир тиббиёт мажмуасида топилган учта оммавий қабрдан камида 392 кишининг жасади топилди.
“Баъзи жасадларда қийноқ ва қатл излари бўлган. Тахминимизча, уларнинг айримлари тириклайин кўмилган. Қидирув тадбирлари давомида болаларнинг жасадларига дуч келдик. Касалхона ҳудудидаги оммавий қабрлардан болалар жасадлари топилгани сабабини ҳозирча билмаймиз. Босқинчи Исроил аскарлари жасадларни полиэтилен пакетларга солиб касалхона ҳудудига 3 метр чуқурликка кўмган. Бу эса жасадлар майдаланиб кетишига олиб келган, шу сабабдан 165 жасаднинг шахсини аниқлаш имкони бўлмаган”, — дейди Хон Юниснинг фуқаролик мудофааси бўлими директори Ямин Абу Сулаймон.
Жасадларнинг Фаластин халқи томонидан кўмилмаганига диққат қаратган фуқаролик мудофааси гуруҳидан Муҳаммад Мугайр жасадларнинг 3 метр чуқурликда кўмилиши ғазоликлар томонидан қабул қилинган дафн қилиш усулларига зид эканини айтди.
Исроил армияси 15 февраль куни Хон Юнисда рейд ўтказди. 24 март куни Исроил аскарлари яна касалхонани қуршаб олди ва кўплаб фаластинликлар ҳамда тиббиёт ходимларини ҳибсга олди. Исроил армияси 4 ойлик қамалдан сўнг 7 апрель куни Хон Юнисдан чекинди. Қўшинлар олиб чиқилгач, шаҳарда оммавий қабрлар топила бошланди, ҳалок бўлганларнинг жасадлари уйлар вайроналари ва йўл четларидан топилди.
Изоҳ (0)