АҚШ 40 йил ичида биринчи марта қитъалараро баллистик ракеталар учун янги W93 ядро каллаги ишлаб чиқаришни бошлайди. Бу ҳақда Байден администрациясидаги юқори мартабали расмийга таяниб, MSN хабар берди.
W93 ишлаб чиқарилиши 2030 йилларнинг ўрталарида бошланиши кутилмоқда. АҚШ жанговар каллакларини ишлаб чиқиш 2022 йил май ойидан бери Энергетика вазирлигининг Лос-Аламос миллий лабораториясида олиб борилмоқда. У ядровий синовларни ўз ичига олмайди, чунки W93 мавжуд технологияларга асосланган.
Энергетика вазири Женнифер Гренҳолм ва Миллий ядровий хавфсизлик агентлиги (NNSA) раҳбари Жилл Ҳрубига кўра, АҚШ ядро синовлари мораторийсига амал қилади. NNSA 2023 йил плутоний ишлаб чиқаришни қайта йўлга қўйишини ва ўнлаб янги ядро каллакларини ишлаб чиқаришини эълон қилган.
Тегишли баёнот Россия президенти Владимир Путиннинг ядровий таҳдидлари ва Россиянинг ўша пайтдаги ягона стратегик қуроллар бўйича шартномадан амалда чиқиб кетиши фонида айтилган.
NNSA стратегик, тактик жанговар каллаклар ва бомбалар учун ҳар йили 80 дона плутоний ядросини ишлаб чиқаришни, Европадаги B61-12 ядро бомбаларининг хизмат қилиш муддатини узайтириш ва сувости кемаларига ўрнатилган Trident II қитъалараро баллистик ракеталарининг жанговар каллакларини модернизация қилишни режалаштирмоқда.
“Америка ядровий каллакларининг муҳим элементи ҳисобланган плутоний ядроси 1980 йилларда муҳандислар томонидан ишлаб чиқилган технологияга таянади”, — дейилади хабарда.
АҚШ ядро каллакларининг аниқ сони махфийдир, аммо ҳисоб-китобларга кўра, тахминан 3700 тани ташкил қилади.
Изоҳ (0)