Ғазо секторининг Хон Юнис шаҳридаги касалхонадан оммавий қабр топилиб, 180 та жасад аниқланди. Бу ҳақда Al Jazeera хабар берди.
Оммавий қабр Исроил қўшинларини 7 апрель куни шаҳардан олиб чиқиб кетганидан кейин аниқланган. Хон Юниснинг кўп қисми Исроилнинг бир неча ой давом этган тинимсиз бомбардимонлари ва шиддатли жангларидан сўнг вайронага айланган.
Касалхона ҳовлисида фуқаролик мудофааси ва тиббиёт ходимлари Исроил ҳарбийлари томонидан оммавий қабрга кўмилган 180 нафар жасадни олиб чиқди. Жасадлар орасида кекса аёллар, болалар ва йигитлар бор, — деди Хон Юнисдаги Al-Jazeera мухбири Хани Маҳмуд.
Фаластин фавқулодда хизматлари шаҳидларни қидириш ишлари давом этиши, чунки “уларнинг сони ҳали ҳам кўп” эканини айтган. Қидирув ишлари 20 апрель куни бошланган ва ҳозиргача давом этмоқда. Ўтган ҳафта бошида аш-Шифа касалхонасида икки ҳафталик қамалдан кейин оммавий қабр топилганди. Бу анклавдаги энг йирик тиббиёт муассасаси — аш-Шифада топилган бир нечта оммавий қабрлардан биридир.
Исроилнинг Ғазога берган зарбаларидан 34,000 дан ортиқ фаластинлик ҳалок бўлди. Қурбонларнинг камида учдан икки қисми болалар ва аёллардир. Бундан ташқари, кўплаб жасадлар ҳаво ҳужумлари натижасида вайроналар остида қолиб кетган ёки шифокорлар етиб бўлмайдиган жойларда. Шу сабабли қурбонлар сони кўпроқ бўлиши мумкин.
Изоҳ (0)