Ғазодаги фавқулодда вазиятлар бригадалари 23 апрель куни Ғазо жанубидаги Носир тиббиёт мажмуасидаги оммавий қабрдан камида 35 та жасадни чиқариб олди. Бу ҳақда CNN нашри хабар берди.
Манбада айтилишича, Исроил кучлари тиббиёт муассасасини тарк этгач, бино ҳовлисидан жасадлар топила бошланган. Ҳозирга қадар касалхона ҳудудидан топилган жасадларнинг умумий сони 310 нафарга етган.
Хон Юнис фуқаролик мудофааси директори, полковник Ямен Абу Сулаймон жасадлар топилиши билан боғлиқ вазият ҳақида CNN телеканалига хабар берган. У жасадларнинг қўл ва оёқлари боғланиб, яланғоч ҳолда кўмиб юборилганини айтган.
“Бу ердаги ҳовлида қатл белгиларини топиш мумкин. Улар тириклайин кўмилганми ёки қатл этилганми, биз билмаймиз. Жасадларнинг аксарияти бўлакланиб кетган”, — деган Ямен Абу Сулаймон.
CNN нашри расмий вакилнинг даъволарини тасдиқлай олмаган. Топилаётган жасадларнинг ўлим сабабларини аниқлаш имкони бўлмаган. Ҳозирда касалхона ҳудудида кўплаб фаластинликлар ҳалок бўлган оила аъзоларини излашмоқда.
Бирлашган Миллатлар Ташкилоти бош котибининг матбуот котиби Стефан Дюжаррик 22 апрель куни Носир касалхонасидан топилган оммавий қабрлар ҳақидаги хабарларни “ўта ташвишли” деб атаган эди.
Изоҳ (0)