Американинг FinanceBuzz номли молиявий консултациялар билан шуғулланадиган компанияси ўзининг веб-сайтига ажойиб эълон қўйди. Унга кўра, “Юлдузлар жанги” франшизасининг тўққизта қисмини томоша қилган шахсга 1000 доллар тўланади.
Бунинг учун компания бир нечта шарт қўйди. Танловда иштирок этиш учун ариза топширувчи мазкур фильмнинг бирорта ҳам қисмини кўрмаган бўлиши, 18 ёшдан катта бўлиши ҳамда албатта АҚШ фуқаролигига эга бўлиши лозим.
Шунингдек, аризачи “Юлдузлар жанги” оламининг бир қисми ҳисобланган “Мандалорлик” сериалини ҳам аввал кўрмаган бўлиши ва сериал асосида яратилган бирорта видео ўйинни ўйнамаган бўлиши шарт.
Танлаб олинган номзод май ойининг охирида бир ҳафта давомида умумий 25 соатлик “Юлдузлар жанги” франшизасини кўриб боради. Компания стриминг хизмати харажатлари ва егулик учун қўшимча 100 доллар пул беришга тайёр.
Танловдан асосий мақсад франшизанинг навбатдаги қисми премьераси учун махсус тайёргарлик кўриш бўлиб, иштирокчи фильмни томоша қилиб бўлгандан сўнг бир нечта саволларга жавоб бериши, ўз таассуротлари ҳақида айтиб ўтиши ва ҳар бир фильмни алоҳида баҳолаши керак бўлади.
Аризалар 4 майгача қабул қилинади. Айнан шу кунда эса машҳур фильмга 25 йил тўлади. Номзод 2 ҳафта ичида танлаб олинади.
Изоҳ (0)