Amerikaning FinanceBuzz nomli moliyaviy konsultatsiyalar bilan shug‘ullanadigan kompaniyasi o‘zining veb-saytiga ajoyib e’lon qo‘ydi. Unga ko‘ra, “Yulduzlar jangi” franshizasining to‘qqizta qismini tomosha qilgan shaxsga 1000 dollar to‘lanadi.
Buning uchun kompaniya bir nechta shart qo‘ydi. Tanlovda ishtirok etish uchun ariza topshiruvchi mazkur filmning birorta ham qismini ko‘rmagan bo‘lishi, 18 yoshdan katta bo‘lishi hamda albatta AQSH fuqaroligiga ega bo‘lishi lozim.
Shuningdek, arizachi “Yulduzlar jangi” olamining bir qismi hisoblangan “Mandalorlik” serialini ham avval ko‘rmagan bo‘lishi va serial asosida yaratilgan birorta video o‘yinni o‘ynamagan bo‘lishi shart.
Tanlab olingan nomzod may oyining oxirida bir hafta davomida umumiy 25 soatlik “Yulduzlar jangi” franshizasini ko‘rib boradi. Kompaniya striming xizmati xarajatlari va yegulik uchun qo‘shimcha 100 dollar pul berishga tayyor.
Tanlovdan asosiy maqsad franshizaning navbatdagi qismi premyerasi uchun maxsus tayyorgarlik ko‘rish bo‘lib, ishtirokchi filmni tomosha qilib bo‘lgandan so‘ng bir nechta savollarga javob berishi, o‘z taassurotlari haqida aytib o‘tishi va har bir filmni alohida baholashi kerak bo‘ladi.
Arizalar 4-maygacha qabul qilinadi. Aynan shu kunda esa mashhur filmga 25 yil to‘ladi. Nomzod 2 hafta ichida tanlab olinadi.
Izoh (0)