Туркия қуролли кучлари 20 апрель куни Сурия шимолидаги ҳарбий операция давомида 5 нафар хавфли террорчини йўқ қилди. Бу ҳақда Anadolu нашри хабар берди.
Хабарда айтилишича, йўқ қилинган террорчилар Курдистон ишчи партиясига алоқадор бўлган. Улар Сурия шимолида жойлашган Туркия ҳарбий объектларида теракт уюштиришни режалаштирган.
“Террорчи ташкилотларга қарши курашимиз фаол давом этади. Салоҳиятимизни камситишларига йўл қўймаймиз”, — дейилган Туркия Мудофаа вазирлиги ҳодиса юзасидан эълон қилган баёнотда.
Расмийлар аксилтеррор тадбир “Фурот қалқони” операцияси доирасида амалга оширилганини хабар қилган. Ҳудудда террорчи ташкилотлар таъсири юқорилиги инобатга олиниб, операция ҳали анча давом этиши мумкинлиги билдирилган.
Қуролли кучларимиз Сурия шимолида Курдистон ишчи партияси террорчиларига қарши амалиётларини давом эттирмоқда. “Фурот қалқони” операцияси ҳудудида аниқланган 5 нафар террорчи зарарсизлантирилди. Сўнгги террорчи зарарсизлантирилгунга қадар унга қарши кураш давом этади, — дейилган расмий хабарда.
Маълумот ўрнида, Курдистон ишчи партияси Туркия, АҚШ ва Европа Иттифоқи томонидан террорчилик ташкилотлари рўйхатига киритилган. Ушбу партия сўнгги 40 йилда Туркияга қарши олиб борган террор кампаниясида 40 000 нафарга яқин тинч аҳоли вакиллари, жумладан, аёллар, болалар ва гўдаклар ҳалок бўлган.
Анқарадаги ҳукумат 2016 йилдан бери Сурия шимолидаги чегараси бўйлаб Курдистон ишчи партияси террорчилик коридори шаклланишига йўл қўймаслик ва аҳолининг тинч йўл билан ҳудудларга қайтишини таъминлаш мақсадида аксилтеррор амалиётларини амалга ошириб келади. Турк ҳукумати расман “Фурот қалқони” (2016), “Зайтун новдаси” (2018) ва “Тинчлик баҳори” (2019) каби ҳарбий операцияларни эълон қилган.
Изоҳ (0)