Исроил ҳарбийлари 20 апрель куни Ғарбий Соҳил ҳудудида амалга оширган амалиётларда 5 нафар тинч аҳоли вакиллари ҳалок бўлди. Бу ҳақда CNN нашри Ғарб нашрларига таяниб, хабар берди.
Манбага кўра, 20 апрель куни Ғарбий Соҳил ҳудудида камида 30 киши жиддий сабабларсиз ҳибсга олинган. Қаршилик кўрсатганлар отиб ташланган.
Фаластиннинг “Вафа” расмий ахборот агентлиги хабар беришича, исроиллик ҳарбийлар босиб олинган Ғарбий Соҳил шимолидаги Тулкарм аҳоли пунктини ўққа тутган. Ҳудудда жойлашган Нур аш-Шамс қочқинлар лагери вайрон қилинган.
Исроил мудофаа кучлари ўз ҳаракатларини қочқинлар лагери ҳудудида террорчилар жамлангани билан изоҳлаган. Лагер ҳудудида бир қанча қидирувдаги шахслар қўлга олингани, бинолар тинтув қилиниб, портловчи моддалар топилгани хабар қилинган.
Ижтимоий тармоқларнинг араб сегментида тарқалган видеолар Исроил ҳарбийлари томонидан қочқинлар лагерига интенсив ҳужумлар ташкил этилганини тасдиқлайди. Ҳужумларда, шунингдек, вояга етмаганлар ҳалок бўлгани маълум бўлган.
Фаластин нашрлари хабар беришича, исроиллик ҳарбийлар фаластинликлар жасадларини яшириб, тез ёрдам бригадалари ҳудудга етиб боришига тўсқинлик қилган. Лагерга олиб борадиган барча йўлларда ҳарбий машиналар жойлаштирилган ва ҳудудда разведка самолётлари учмоқда.
Изоҳ (0)