Томошабинларга фильм ва сериалларда суратга тушиш четдан назар солганда мушкул бўлмаган жараёндек туюлади. Гримчилар актёр атрофида айланиб, ташқи кўринишини тўғрилаб қўяди, кейин эса унинг истеъдодига қойил қолиш навбати оператор ва режиссёрга келади. Аммо буларнинг ортида катта меҳнат, турли жисмоний ва руҳий қийинчиликлар турганини унутиб қўямиз. Айниқса жангари фильмлар съёмкаси кўплаб актёрлар ҳаётига хавф солиши ва турли жароҳатлар олиб келиши мумкин. Қуйида жиддий жароҳат олган машҳур актёр ва актрисалар ҳақида сўз боради.
Шарлиз Терон
2005 йилда суратга олинган “Эон Флакс” фильми актриса Шарлиз Терон учун сўнгги лойиҳа бўлиши мумкин эди. У орқага қараб салто бажараётган вақтда бўйни билан йиқилиб тушган. Тиббий кўрикда Шарлиз фалаж бўлишига бир бахя қолганини шифокорлар таъкидлаган. Актрисанинг омади келиб, йиқилиш хавфли бўлмаган.
Жорж Клуни
2005 йил 23 ноябрда премьераси бўлиб ўтган “Сириана” сиёсий триллери Жорж Клунига “Оскар” мукофоти билан бирга бош мия жароҳатини ҳам келтирди. Фильмда актёр стулга боғлаб қўйилган саҳна бор эди. Жорж стул билан бирга тасодифан орқага ағдарилиб кетган. Ўша куни юлдуз шифокор кўригига бориш зарур деб ҳисобланган, аммо кўп ўтмай Жоржни тўхтовсиз бош оғриқлари безовта қила бошлаган. Бир қатор тиббий текширувлардан кейин шифокорлар Клуни мияни ҳимоя қилувчи мембранани шикастлаб, мия бош суягига жуда яқин туриб қолганини аниқлаган.
Жеки Чан
Актёр ва каскадёр Жеки Чан деярли барча суякларини синдириб олгани ҳақида кўп таъкидлаган, аммо бир жароҳат унинг умрига зомин бўлиши мумкин эди. 1991 йилда Югославияда суратга олинган “Мўъжизавий аслаҳалар” фильмида актёр девордан дарахт шохига сакраши лозим эди. Биринчи дублда Жеки буни уддалади, аммо иккинчи дублда у боши билан тошга йиқилди ва зудлик билан касалхонага олиб борилди. Муваффақиятли кечган операциядан сўнг Жеки Чан яна суратга олиш ишларига шўнғиб кетди.
Том Ҳенкс
Актёр Том Ҳенкс бош ролни ижро этган “Одамлардан йироқда” фильми инсон қадами етмаган Монурики оролида бўлиб ўтган. Суратга олиш жараёнида актёр бир оз оёғидан лат ейди ва кичик жароҳатга парво қилмайди. Икки ҳафта ўтгач оёқдаги жароҳат қайта қонайвериши ва оғриқлар кучайиб боргани сабабли Том тиббий ёрдамга мурожаат қилди. Шифохонада аниқланишича, актёрда стафилококк инфекцияси ривожланиб, уни секин-аста емириб бораётган бўлган. Ўз вақтида амалга оширилган тиббий муолажалар актёр тузалиб кетишига сабаб бўлган.
Брендон Ли
“Қарға” фильми отаси Брюс Ли каби Брендонга ҳам улкан муваффақият келтириши кутилмоқда эди. Бироқ суратга олиш майдончасида бахтсиз ҳодиса юз беради ва ёш актёр тўсатдан вафот этади. Актёр ўлимига бўш патронлар ва пистолет ички қисмида қолиб кетган тиқин билан қоринга отилган ўқ сабаб бўлди. Тиқин умуртқа поғонасига етиб борган ва ўткир қон кетишига сабаб бўлган.
Изоҳ (0)