Қозоғистоннинг сув босган ҳудудларидан 108 мингдан зиёд одам эвакуация қилинди. Бу ҳақда мамлакат Фавқулодда вазиятлар вазирлиги хабар берди.
Маълумотларга кўра, фуқаро муҳофазаси хизматлари томонидан 108,2 минг киши, жумладан, 38,706 нафар болалар қутқарилди, 11 950 киши уйига қайтди. Аҳолини вақтинчалик жойлаштириш марказларида 7444 киши, шу жумладан, 3111 нафар болалар бор, 126 та шошилинч психологик ёрдам кўрсатилган.
Сўнгги ҳафталарда Қозоғистонда кучли сув тошқинлари кузатилди. Қозоғистоннинг бир қанча вилоятларида (Абай, Ақмўла, Ақтўбе, Атирау, Ғарбий Қозоғистон, Қарағанда, Қўстанай, Павлодар, Шимолий Қозоғистон ва Улитов) маҳаллий фавқулодда ҳолат режими эълон қилинди.
Бош прокуратура Қозоғистондаги сув тошқини юзасидан мансабдор шахслар ўз хизмат вазифаларида бепарволикка йўл қўйгани учун текширилишини билдирди. Қозоғистон президенти Қосим-Жўмарт Тўқаев аҳолига етказилган зарар қопланишга ваъда берди. “Казгидромет” маълумотларига кўра, бир қанча ҳудудларда сув тошқинининг иккинчи тўлқини хавфи кутилмоқда.
Сув тошқини сабаби қорнинг тез эришига олиб келган тўсатдан исиш бўлди. Қозоғистоннинг Eurasia суғурта компанияси ҳисоб-китобларига кўра, тошқин оқибатида юзага келиши мумкин бўлган зарар тахминан 6 миллиард тенгени ташкил қилиши мумкин. Расмийлар ҳозирча бу борада расмий маълумот бермаган. Тўқаев сув тошқини туфайли Остона халқаро форумини бекор қилган. У бу қарорни вайронагарчилик оқибатларини бартараф этиш учун маблағни тежаш зарурлиги билан асослаган. Форум жорий йилнинг 13—14 июнь кунлари бўлиб ўтиши керак эди.
Изоҳ (0)