Qozog‘istonda suv bosgan hududlardan 108 mingdan ortiq odam evakuatsiya qilindi

Qozog‘istonning suv bosgan hududlaridan 108 mingdan ziyod odam evakuatsiya qilindi. Bu haqda mamlakat Favqulodda vaziyatlar vazirligi xabar berdi.

Ma’lumotlarga ko‘ra, fuqaro muhofazasi xizmatlari tomonidan 108,2 ming kishi, jumladan, 38,706 nafar bolalar qutqarildi, 11 950 kishi uyiga qaytdi. Aholini vaqtinchalik joylashtirish markazlarida 7444 kishi, shu jumladan, 3111 nafar bolalar bor, 126 ta shoshilinch psixologik yordam ko‘rsatilgan.

So‘nggi haftalarda Qozog‘istonda kuchli suv toshqinlari kuzatildi. Qozog‘istonning bir qancha viloyatlarida (Abay, Aqmo‘la, Aqto‘be, Atirau, G‘arbiy Qozog‘iston, Qarag‘anda, Qo‘stanay, Pavlodar, Shimoliy Qozog‘iston va Ulitov) mahalliy favqulodda holat rejimi eʼlon qilindi.

Bosh prokuratura Qozog‘istondagi suv toshqini yuzasidan mansabdor shaxslar o‘z xizmat vazifalarida beparvolikka yo‘l qo‘ygani uchun tekshirilishini bildirdi. Qozog‘iston prezidenti Qosim-Jo‘mart To‘qayev aholiga yetkazilgan zarar qoplanishga va’da berdi. “Kazgidromet” ma’lumotlariga ko‘ra, bir qancha hududlarda suv toshqinining ikkinchi to‘lqini xavfi kutilmoqda.

Suv toshqini sababi qorning tez erishiga olib kelgan to‘satdan isish bo‘ldi. Qozog‘istonning Eurasia sug‘urta kompaniyasi hisob-kitoblariga ko‘ra, toshqin oqibatida yuzaga kelishi mumkin bo‘lgan zarar taxminan 6 milliard tengeni tashkil qilishi mumkin. Rasmiylar hozircha bu borada rasmiy ma’lumot bermagan. To‘qayev suv toshqini tufayli Ostona xalqaro forumini bekor qilgan. U bu qarorni vayronagarchilik oqibatlarini bartaraf etish uchun mablag‘ni tejash zarurligi bilan asoslagan. Forum joriy yilning 13—14-iyun kunlari bo‘lib o‘tishi kerak edi.