Тошкентда икки қаватли савдо дўконида ёнғин юз берди (видео)

Тошкент шаҳар Фавқулодда вазиятлар бошқармаси Учтепа туманида жойлашган икки қаватли савдо дўконида содир бўлган ёнғин юзасидан маълумот берди.

Қайд этилишича, 27 март куни соат 06:50 да Учтепа тумани, Кичик ҳалқа айланма йўли кўчасида жойлашган 2 қаватли биноларнинг бирида ёнғин содир бўлаётгани тўғрисида Тошкент шаҳар ФВБга хабар тушган.

Шунга кўра, 4 та ёнғин-қутқарув экипажи воқеа жойига соат 06:57 да етиб бориб, ёнғин соат 07:20 да ўраб олинган ва соат 07:23 да ўчирилган. Содир бўлган ёнғин оқибатида 2 қаватли биноларнинг бирида  тахминан 100 квадрат метр майдонда том қисми ёниб зарарланган.

Ҳодиса оқибатида ҳалок бўлган ва жабрланганлар йўқ. Ҳозирда ёнғин сабаби ва моддий зарар миқдори аниқланмоқда, — дейилади хабарда.

Февраль охирларида Тошкентда мебел ишлаб чиқариш цехида ёнғин чиққани ва уни ўчиришга 20 та экипаж жалб этилгани тўғрисида хабар берилганди.