Украинада ҳарбий хизматчилар ва ҳуқуқ-тартибот идоралари ходимларига нақд пул тўловлари 170 минг гривнага (54 миллион сўмдан зиёд) оширилди. Бу ҳақда мудофаа вазири Рустем Умеров хабар берди.
“Бугун биз адолат ва ҳимоячиларимизга муносиб ҳурматни таъминлаш йўлида муҳим қадам ташладик”, — деб ёзган Умеров ўзининг Facebook саҳифасида.
Унинг сўзларига кўра, Вазирлар Маҳкамаси президент Владимир Зеленский, Украина армияси бош қўмондони Александр Сирский билан яқин ҳамкорликда Мудофаа вазирлиги ташаббуси билан ҳарбий хизматчилар ва полиция ходимлари ойлигини ошириш тўғрисида қарор қабул қилган.
Натижада, тўловларнинг умумий миқдори 100 минг гривна (тахминан 32 миллион сўм) миқдоридаги базавий миқдор ва 70 минг гривна (22,5 миллион сўм) миқдоридаги қўшимча мукофот пулидан иборат бўлиб, у ҳар 30 кунда тўқнашув чизиғи ва душман ҳудудидаги ҳарбий ҳаракатларда фаол қатнашганлик учун тўланади.
Умеровнинг қайд этишича, бу ҳар куни ўз ҳаётини хавф остига қўйиб, мамлакат эркинлиги ва келажагини ҳимоя қилаётган Украина ҳарбийлари учун қўшимча рағбат бўлади.
Ҳарбий ҳолат даврида украин ҳарбий хизматчиларга тўловлар икки қисмдан иборат: ойлик нақд пул таъминоти ва қўшимча иш ҳақи, бу 30, 50 ва 100 минг гривна миқдоридаги (салкам 10, 16 ва 32 миллион сўм) бонуслардир. Пул таъминотининг ўзи яна икки қисмга бўлинади:
- асосий молиявий ёрдам — расмий, ҳарбий унвонга мувофиқ иш ҳақи ва иш стажи учун мукофот;
- қўшимча пул ёрдами — хизматнинг ўзига хос хусусиятлари учун имтиёзлар.
Изоҳ (0)