Тармоқларда 14 апрель куни Ерга К-индекси 4 бўлган сариқ даражадаги магнит бўрони келиб, геомагнит фаолликнинг чўққиси соат 14:00 да содир бўлиши ҳақида хабарлар тарқалди.
Асаб ва руҳият илмий-тиббий маркази директори, профессор Зарифбой Ибодуллаевнинг “Дарё” мухбирига магнит бўронининг инсон саломатлигига таъсири хусусида тушунтириш берди. Унинг айтишича, инсон ҳам биомайдон ҳисобланади ва унга магнит майдони таъсир қилади.
Ернинг магнит майдони бор. Инсон ҳам биомайдон, тирик организм, тирик ҳужайра бор эканки, унинг атрофида магнит майдони бўлади. Дисбаланс бўлган вақтда, магнит майдони кучайганида мигрен, ревматизм, қон босими ва бошқа касалликлар кучаяди.
Бундай ҳолатларда оғриқ қолдирадиган дори ёки қон босимини меъёрлаштирадиган дорини ичиш тавсия этилади, — дейди профессор.
Унинг қўшимча қилишича, баъзан магнит бўрони ўтиб кетмагунга қадар бош оғриғи ҳам ўтиб кетмайди.
Ўзбекистон тиббий-илмий фаолият билан шуғулланувчилар табобат академияси раиси, профессор Иброҳимжон Асқаров магнит бўрони ва унинг инсон организмига қай даражада таъсири ҳақида мулоҳазаларини билдириб ўтди.
“Магнит бўрони бор нарса, организмга таъсир қилади. Лекин ваҳима қилмаслик керак. Магнит бўрони ҳақидаги хабарларни ўқигандан кейин одам касал бўлиб қолади. Магнит бўрони бўляпти, юрагим ўйнаяпти, деб бориб ётиб олади. Ўз вақтида овқатланиб, ишда давом этиш мумкин.
Шахсий фикрим, бу нарса бор, лекин организмни озгина эҳтиёт қилиб турилса, кифоя. Ортиқча ваҳимага ўрин йўқ”, — деди Иброҳимжон Асқаров.
Олий тоифали шифокор Раъно Носировага кўра, Ернинг магнит майдони таъсири одатда инсонларга сезилмайди. Бироқ баъзан ушбу майдонда айрим одамлар ҳис этиши мумкин бўлган тебранишлар кузатилади. Бунинг асосий сабабчиси Қуёшдир.
Яъни одатда унинг фаоллиги кузатилганда сайёрани магнит бўронлари қоплайди. Бу эса сурункали хасталикларга чалинган инсонлар саломатлигига салбий таъсир этиши мумкин. Айниқса, юрак-қон томир, асаб тизими касалликлари, қандли диабет ва бронхиал астма билан оғриётган беморлар бу ўзгаришларни кўпроқ ҳис этади.
Изоҳ (0)