Замонавий геомагнит бўрони прогноз моделлари 16—17 декабрь кунлари Ерда 5 баллик геомагнит бўронлари бўлишини прогноз қилмоқда. Бу ҳақда иқлимшунос Эркин Абдулаҳатов маълум қилди.
Олимнинг айтишича, Тошкент вақти билан 15 декабрь куни соат 12:45 да ҳам Қуёшнинг 3514 фаол зонасида (қуёш доғи) навбатдаги кучли чақнаш рўй берган.
Қуёш 2024—2025 йиллар учун энг фаол чақнашлар кузатиладиган 11 йиллик циклик даврга кириб бормоқда.
Қуёшнинг 3514 зонасидаги кеча ва бугунги кучли чақнашлар Ерга тўғридан тўғри кучли таъсир кўрсатмайди.
Мутахассислар бу ҳозирда Ер ва Қуёшнинг астрономик жойлашуви сабаб шу каби хулосага келишган.
Аммо, барибир портлашдан ажралган плазманинг шамоллари Ерга бир оз таъсир этиши ва 16 декабрь куни кечга бориб, сайёрада геомагнит қўзғалишлар бўлиши прогноз қилинмоқда, – дейди Эркин Абдулаҳатов.
Унинг қўшимча қилишича, ҳозир қуёш активлик фазасига кириб бормоқда.
“Қуёшнинг сокинлик даврида 3-4 ойда бир марта геомагнит бўронлари (4 баллдан юқори) кузатиладиган бўлса, унинг активлик даврида ой давомида 3-4, баъзан 5-6 марта геомагнит қўзғалишлари рўй беради.
Бизни олдинда икки йиллик шу каби фаол геомагнит қўзғалишлар даври кутиб турибди”, – деди иқлимшунос.
Олий тоифали шифокор Раъно Носировага кўра, Ернинг магнит майдони таъсири одатда инсонларга сезилмайди. Бироқ баъзан ушбу майдонда айрим одамлар ҳис этиши мумкин бўлган тебранишлар кузатилади. Бунинг асосий сабабчиси Қуёшдир.
Яъни одатда унинг фаоллиги кузатилганда сайёрани магнит бўронлари қоплайди. Бу эса сурункали хасталикларга чалинган инсонлар саломатлигига салбий таъсир этиши мумкин. Айниқса, юрак-қон томир, асаб тизими касалликлари, қандли диабет ва бронхиал астма билан оғриётган беморлар бу ўзгаришларни кўпроқ ҳис этади.
Изоҳ (0)