Қорақалпоғистон Республикаси божхона бошқармаси “Довуд-ота” чегара божхона пости ходимлари томонидан Божхона қўмитасининг Таргетлаш ва хавфларни мониторинг қилиш бошқармаси билан ҳамкорликда яширин иқтисодиётнинг олдини олиш тадбирлари ўтказилди.
Қайд этилишича, божхона расмийлаштирувига тақдим этилмаган товарларнинг ноқонуний тарзда мамлакат ҳудудига кириб келишининг олди олинган.
Мазкур пост орқали қўшни Қозоғистондан кириб келган MAN русумли юк автотранспорт воситаси “Хавфни бошқариш” тизими томонидан “қизил” йўлакка йўналтирилгани сабабли, Нукус шаҳридаги божхона омборларидан бирида божхона кўригидан ўтказилган. Натижада божхона тўловларидан қочиш мақсадида йўл юк ҳужжатларида кўрсатилмаган қиймати 588 миллион сўмга тенг бўлган 168 минг жуфт “Резина қопламали трикотаж қўлқоп” товарларини божхона расмийлаштирувига тақдим қилмасдан, мамлакат ҳудудига олиб кириш ҳолати аниқланган.
Мазкур ҳолат юзасидан божхона органлари томонидан терговга қадар текширув ҳаракатлари олиб борилмоқда.
Аввалроқ “Яллама” постида 830 млн сўмлик LED чироқларнинг мамлакатга ноқонуний олиб кирилишига чек қўйилгани тўғрисида хабар берилганди. Шунингдек, Бухорода 15,5 млрд сўмлик пестицидларнинг мамлакатга ноқонуний олиб кирилишининг олди олинган эди.
Изоҳ (0)