“Зеленскийнинг Қрим кўпригига ҳужум қилиш режаси Россиянинг ҳарбий ҳаракатлари тўғрилигини исботлайди” — Песков

Россия президенти матбуот котиби Дмитрий Песков Украина президенти Владимир Зеленскийнинг Қрим кўпригига ҳужум қилиш режалари ҳақидаги баёнотига изоҳ берди. Унга кўра, бу “махсус ҳарбий операция бошланганининг тўғрилигини исботлайди”.

“Киев режими Россия инфратузилма объектларига қарши ўзининг тажовузкор террорчилик режалари ҳақида очиқ гапирмоқда. Бу билан улар Россия президенти томонидан махсус ҳарбий операцияни бошлаш бўйича қабул қилинган қарорларнинг мутлақ тўғрилиги исботлайди”, — деди Песков.

Зеленский немис медиа гуруҳи Ахеl Springer’га берган интервьюсида янги қарши ҳужум режасини эълон қилди. Бу режа Қрим кўприги ва бошқа инфратузилмаларга ҳужумни ўз ичига олади. Украина ҳарбий разведкаси раҳбари Кирилл Будановнинг айтишича, Қрим кўприги “яхши ҳимояланган”, бироқ Украина “бу муаммо устида ишламоқда”.

Украина бир неча бор Қрим кўпригига ҳужум қилишга уринган. Бундай ҳужумлар оқибатида икки марта кўприк қисман шикастланган.