Ўзбекистоннинг янги тайинланган элчиси Фаррух Турсунов Мадрид шаҳрида Испания қироли Филипп VI га ишонч ёрлиқларини топширди. Бу ҳақда “Дунё” АА хабар берди.
Маълум қилинишича, расмий маросимдан сўнг бўлиб ўтган суҳбат чоғида Ўзбекистон ва Испания ўртасидаги икки томонлама ҳамкорликнинг бугунги ҳолати ва истиқболлари, шунингдек, халқаро кун тартибидаги долзарб масалалар муҳокама қилинган.
Қирол Филипп VI Ўзбекистонда амалга оширилаётган кенг кўламли ислоҳотларни юксак баҳолаб, президент Шавкат Мирзиёев раҳнамолигида Ўзбекистонда кучли фуқаролик жамияти барпо этиш, очиқ ташқи сиёсатни амалга ошириш, барқарор иқтисодий ўсишни таъминлаш борасида салмоқли ютуқларга эришилганини таъкидлаган.
Ўзбекистон президентининг сиёсий ташаббуслари, ўз мамлакати фаровонлиги, шунингдек, бутун Марказий Осиё минтақасидаги жараёнлар, айниқса, қўшни Афғонистондаги вазиятни барқарорлаштиришга қўшаётган ҳиссаси алоҳида қайд этилган.
Испания қироли, шунингдек, икки томонлама муносабатларни барча жабҳаларда мустаҳкамлаш ва ривожлантириш борасидаги саъй-ҳаракатларга ҳисса қўшишга тайёрлигини билдирган.
Учрашув якунида қирол Филипп VI Ўзбекистон элчисига икки мамлакат ўртасидаги ўзаро муносабатларни мустаҳкамлаш борасидаги масъулиятли ишларига муваффақиятлар тилади.
Изоҳ (0)