Япониянинг МAPPА студияси томонидан эфирга узатилган “Сеҳрли жанг” (Jujutsu Kaisen) анимеси Гиннес рекордлари китобига киритилди. Бу ҳақда “Правила жизни” нашри хабар бермоқда.
Аниме премьераси 2020 йил 2 октябрда бўлиб ўтган эди. Parrot Analytics тадқиқот компанияси томонидан берилган маълумотларга кўра, “Сеҳрли жанг” мультфильми 2023 йилда дунёдаги энг кўп томоша қилинган анимега айланди.
Анименинг глобал рейтинги мазкур тоифа бўйича 71,2 баравар юқори талабга эга бўлди. Аввалроқ бундай рекордни “Титанлар ҳужуми” анимеси ўрнатган эди.
Сюжетга кўра, сеҳрли коллеж талабалари ўз ўқитувчилари билан биргаликда Сукуна исмли иблис мавжудотни мағлуб этишга ҳаракат қилади. “Сеҳрли жанг” анимеси икки фаслдан иборат. Шунингдек, сериалнинг аввалги воқеаларни тушунтириб берувчи анимацион бадиий фильм ҳам томошабинларга тақдим этилган.
Ўтган йил декабрь ойида сериалнинг учинчи мавсуми чиқиши маълум бўлди. IMDb рейтингига кўра аниме 10 баллдан 8,6 балл тўплади, Кинопоискда эса томошабинлар уни 8,2/10 балл билан баҳолади.
Изоҳ (0)