Enter Engineering ишчилари маош йўқлиги сабаб ишлашда давом этишдан бош тортаётгани, 2023 йилдан бери маошини ололмаётган ишчилар шу тарзда норозилигини намойиш қилаётгани хабар берилганди.
Компания масъулларининг баёнот беришича, ишчиларга 2024 йилнинг февраль ойи учун ҳам маош тўланган. Март ойи учун маош тўлаб бериш жараёнлари давом этмоқда.
Ходимларнинг иш ҳақи бевосита буюртмачи олдида бажарилган иш ҳажмининг муваффақиятли асослаб берилишига тўғридан тўғри боғлиқ. Шунга кўра, ҳозирги кунда ходимларнинг февраль ойи учун маошлари тўлиқ тўлаб берилган. Айни вақтда март ойи учун ҳажмларни асослаш жараёни кетмоқда, уларнинг якунига кўра, бутун иш ҳақи тўлаб берилади. Яъни шундай тартиб борки, унга кўра, аввалига қурилиш объектларида олдинги ойда бажарилган ишлар ҳажми буюртмачи олдида ҳимояланиши керак. Айнан ҳимоя қилинган ҳажмлар иш ҳақини баҳолаш учун асос бўлиб хизмат қилади. Сўнгра солиқларни ҳисоблаш ва ҳисоботларни топшириш, шунингдек, ходимларга тўлиқ маош бериш жараёнлари содир бўлади. Буларнинг ҳаммаси вақтни талаб қилади.
Ушбу механизмга кўра, айни вақтда Enter Engineering компаниясида ходимларга март ойи учун иш ҳақини тўлаш жараёни кетмоқда. Бу, биринчи навбатда, қурилиш компаниясининг ўзи, қолаверса, сифат назорати хизматлари ва буюртмачининг мустақил техник назорати хизматлари томонидан текширилиши керак бўлган қурилиш ишларининг ўзига хос хусусиятлари билан боғлиқ, — дейилади компаниянинг Telegram’даги расмий каналида тарқалган хабарда.
Билдирилишича, ижтимоий тармоқларда тарқалаётган видеолар уч йил олдинги фейк видеолар ҳисобланади.
Реал фактларга асосланмаган ушбу лавҳаларни тарқатмаслигингизни сўраб қоламиз. Шунингдек, компания ҳам, буюртмачилар ҳам ходимлари олдидаги барча мажбуриятларини бажариб келишини алоҳида айтиб ўтмоқчимиз, — дейди масъуллар.
Компаниянинг бу маълумоти билан танишган ишчилар масъуллар ёлғон гапириб, вазиятдан чиқишга уринаётганини айтмоқда.
Бу ёлғон, шунчаки вазиятдан чиқиш учун айтилаётган маълумот. Бизда 2023 йилнинг ноябрь ойи учун ҳам маош олмаганлар бор. 2024 йилнинг январь, февраль ойи ҳақида гапирмасак ҳам бўлади, — дейди бу ҳақда таҳририятга гапирган суҳбатдош.
Яна бир ишчининг маълум қилишича, бугунги тўполонлар сабаб масъуллар кўпчиликка таҳдид қилиб, ишдан бўшатиш билан ҳам қўрқитган.
Telegram’да Шоҳрух Эргашов номи билан ишчиларнинг бирига ёзган масъул маош сўраб, тўполон қилганларни “пода” деб номлаб, ишчига уларга қўшилмасликни маслаҳат беради.
“Ният қанақа? Ишлашми ёки ‘уволнения’ ”, дея савол берган у ишчиларнинг бирига Telegram орқали хабар ёзар экан. Ишчи эса тўғри йўлда эканини, ишдан бўшатишса ҳам, кўчада иш кўплигини таъкидлайди.
Изоҳ (0)