Финляндия ҳукумати Россия билан қуруқликдаги чегара пунктларини 15 апрелдан бошлаб номаълум муддатга ёпиқ сақлашга қарор қилди. Бу ҳақда Финляндия ИИВ маълум қилди.
Бундан ташқари, 15 апрелдан бошлаб денгиз орқали ноқонуний миграциянинг олдини олиш учун Хаапасаари, Нуижамаа порти ва Сантиодаги денгиз ўтиш пунктлари ёпилади.
Қарор хабар берилгунга қадар кучда қолади, — дейилади ИИВ хабарида.
Россия билан чегарани очишда Финляндия ҳукумати Россия томонидан чегарани кесиб ўтиб, Финляндиядан бошпана сўровчи учинчи давлат фуқароларининг оммавий ноқонуний миграциясининг қайта тикланиш хавфини кўрмоқда.
Финляндия чегараси яқинидаги Россия ҳудудида мамлакатимизга қарши ишлатилиши мумкин бўлган минглаб одамлар бор, — деди Финляндия ички ишлар вазири Мари Рантанен.
Финляндия расмийлари Россиянинг “миграцияни инструменталлаштириш” сиёсатини “гибрид ҳужум” ва “узоқ муддатли таҳдид” сифатида баҳолайди.
Ҳукуматнинг чегарани ёпиш ҳақидаги аввалги қарори 14 апрелгача амал қилган эди.
2023 йил ноябрида Финляндия муҳожирлар оқими туфайли Россия билан қуруқликдаги чегарасини тегишли ҳужжатларсиз бутунлай ёпган эди. Хелсинки Москвани учинчи давлат фуқароларини чегарани кесиб ўтишга ундаганликда айблаган.
Бунга жавобан Россия ТИВ матбуот котиби Мария Захарова Финляндиянинг чегарадаги вазият учун жавобгарликни Россия зиммасига юклашга уринишларини “ноаниқ баҳоналар” деб атаган эди.
Изоҳ (0)