Финляндия чегара хизмати Россия билан чегарадаги вақтинчалик назорат-ўтказиш постларини бутунлай ёпишни режалаштирмоқда. Финляндияга ёғоч етказиб бериш асосан шу назорат пунктлари орқали амалга оширилган. Мазкур постлар бир неча йилдан бери ишламаяпти.
Финляндия чегара хизмати раҳбари ўринбосари Марко Саарекснинг Yle нашрига айтишича, Россия биринчи бўлиб Париккала ва Инари постларини тўлиқ ёпишни таклиф қилган, шундан сўнг Финляндия томони бу масалани муҳокамага қўйган.
Телеканал хабар беришича, 2023 йилда Европа Иттифоқи Финляндия эътиборини Россия Федерацияси билан чегарадаги вақтинчалик назорат-ўтказиш пунктларига қаратиб, улар камситувчи характерга эга эканлигига қаратган. Чунки бу постлар орқали фақат икки давлат фуқаролари ўтиши мумкинлиги белгиланганди.
Чегара хизмати маҳаллий ҳокимият органлари ва вақтинчалик назорат пунктларидан фойдаланган компаниялардан февраль ойи охиригача назорат-ўтказиш пунктининг тўлиқ ёпилиши бўйича ўз фикрларини билдиришни сўради. Бу борада қарама-қарши фикрлар юзага келган. Чегара хизмати якуний қарорни баҳор ёки ёзда қабул қилади, деб ёзади Yle.
2023 йил ноябрь ойи ўрталарида Финляндия ҳукумати Россия билан чегарадаги назорат-ўтказиш пунктлари фаолиятини чеклашни бошлади. Йил охирига келиб барча назорат пунктлари ёпилди. Финляндия ҳукумати бундай чораларни Россия ҳудудидан мамлакатга кириб келаётган ноқонуний мигрантларнинг кўплиги билан изоҳлади.
2024 йил февраль ойида Финляндия Россия Федерацияси билан чегарани ёпиш муддатини 14 апрелгача узайтирганди.
Изоҳ (0)