Қўшма Штатларда чўчқа буйраги муваффақиятли трансплантация қилинган бемор шифохонадан чиқди. Бу ҳақда Массачусетс умумий касалхонаси ўзининг Х ижтимоий тармоғидаги саҳифасида маълум қилди.
Икки ҳафта олдин дунёда биринчи марта гени ўзгартирилган чўчқа буйраги муваффақиятли трансплантация қилинган 62 ёшли Рик Слейман шифохонадан чиқарилди. Операция Бостондаги Массачусетс умумий касалхонасида март ойи охирида бўлиб ўтган эди.
Беморнинг соғайиш жараёни яхши кечмоқда, — дейди шифокорлар.
Шифокорларнинг сўзларига кўра, Слейман тез тузалмоқда ва уйда оиласи бағрида даволанишни давом эттиради. Шифокорлар янги буйрак яхши ишлашини ҳамда бемор энди диализга муҳтож эмаслигини айтган.
Слейман узоқ вақтдан бери буйрак етишмовчилигидан азият чеккан. Олти йил олдин худди шу касалхонада унга одам буйраги қўйилган, аммо унинг танаси буйракни қабул қилмаган.
Шифокорлар муҳтож бўлган ҳар бир киши учун донор органлар етарли эмаслигини айтиб, муваффақиятли операцияни муҳим босқич деб атаган.
Изоҳ (0)