Яқин Шарқда кечаётган қонли уруш ҳаракатлари бошқа ҳудудларга ҳам ёйилишни бошлади. Кеча, 1 апрель куни тунда Исроил ҳарбий-ҳаво кучлари Сурия пойтахти Дамашқ шаҳрида жойлашган Эрон элчихонаси ва консуллигига ракета зарбасини амалга оширди.
Маълумотларга кўра, ҳужум натижасида 7 та эронлик ҳарбий, 3 нафар Сурия фуқароси ва 1 нафар ливанлик ҳалок бўлган. Reuters агентлигининг ёзишича, Ислом Инқилоби Қўриқчилари Корпуси генерали Муҳаммад Зоҳидий Исроилнинг Эрон консуллигига уюштирган ҳужуми натижасида ҳалок бўлган. Хўш, нега Исроил халқаро ҳуқуқ нормаларини бузган ҳолда Сурия ҳудудидаги Эрон элчихонасини бомбардимон қилди? Ҳужумдан кўзланган мақсад Эронни урушга тортишми? "Дарё" ушбу саволлар билан Фарҳод Каримовга юзланди.
Сиёсатшунос Фарҳод Каримовнинг таъкидлашича, ҳужумдан кўзланган асосий мақсад — Ислом Инқилоби Қўриқчилари Корпуси генерали Муҳаммад Зоҳидийни йўқ қилиш бўлган.
“Ҳужумнинг асосий мақсади — Ислом Инқилоби Қўриқчилари Корпуси генерали Муҳаммад Зоҳидийни йўқ қилиш бўлган. Чунки, Муҳаммад Зоҳидий Эронни бутун минтақа билан, хусусан, “Ҳизбуллоҳ” билан муносабатларини боғловчи муҳим шахс ҳисобланган. Бу орқали Исроил минтақада “Ҳизбуллоҳ” ва Эроннинг таъсирини камайтирмоқчи. Ҳозир Исроил бу ҳужум борасида ҳеч қандай фикр билдирмаяпти. Лекин бошқа давлат ҳудудидаги учинчи мамлакатнинг дипломатик корпус вакилларини йўқ қилиниши ҳар қандай халқаро ҳуқуқ-нормаларига зид. Бунинг оқибати ўта аянчли бўлиши мумкин. Эрон ҳам жавоб қайтарса керак. Сабаби Исроил мутлақо уруш қоидаларини бузган ҳолда ҳаракат қилмоқда. Бугун биз Исроилни барча халқаро ҳуқуқ-нормаларини умуман тан олмаган ҳолда чегарадан чиқаётганига гувоҳ бўлмоқдамиз. Бу Исроилни ортида турган кучларнинг қўллови билан амалга ошмоқда”, — дейди сиёсатшунос.
Исроил томонидан Суриядаги Эрон консуллигига қилинган ҳужум ортидан Эроннинг БМТдаги элчиси Хавфсизлик Кенгашидан “бу жиноий ҳаракатни имкон қадар кескин қоралашни ва халқаро ҳуқуқ нормалари ва тамойилларини очиқдан-очиқ бузаётганини кўриб чиқиш учун зудлик билан йиғилиш ўтказишни сўради”. Шунингдек, мактубда “Эрон ушбу террорчилик ҳужумига қатъий жавоб бериш учун қонуний ва ажралмас ҳуқуқни ўзида сақлаб қолиши” қайд этилган.
“Эрон БМТга мурожаат қилиш орқали, ўзи берадиган жавоб зарбаларини халқаро нуқтаи назардан қонунийлаштириб олмоқда. Демак, Эрон томонидан Исроилга жавоб бўлади. Чунки мамлакат ваколат хонасига ҳужум қилиш, ҳеч қайси уруш қонун-қоидаларига тўғри келмайди. Лекин бу конфликт минтақада катта урушга олиб келмайди”, — деди сиёсатшунос Фарҳод Каримов.
Ҳозирча Исроил ҳукумати Эрон элчихонасига амалга оширилган ҳужум борасида расмий муносабат билдирганича йўқ.
Изоҳ (0)