Жиноят ишлари бўйича Фориш туман суди томонидан 13 февраль куни судланувчи А.Н га нисбатан жиноят иши кўриб чиқилди. Бу ҳақда Фориш туман суди матбуот хизмати хабар берди.
Судда аниқланишича, судланувчи А.Н 2018 йил 16 ноябрь куни Жиззах вилояти, Фориш туманига ов қилиш мақсадида бориб, 17 ноябрь куни соат 18:10 ларда ов қуролидан фойдаланишда тегишли хавфсизлик чораларини кўрмаган.
Шу сабабли ўзига қарашли, 1976 йилда ишлаб чиқарилган, МС-2112 русумли, 12 калибрли, силлиқ стволли ов қуролини ўқсизлантираётган вақтида эҳтиётсизлиги оқибатида ов қуроли ичида қолиб кетган 12 калибрли сочма патрон отилиб кетиб, шу ерда бўлган, С.Р. нинг кўкрак қафасининг чап қисми жароҳатланган.
Оқибатда тан жароҳати олган С.Р. воқеа жойида вафот этган.
Суд томонидан А.Н га ЖКнинг 102-моддасининг 1-қисми (Эҳтиётсизлик орқасида одам ўлдириш) ва ЖКнинг 45-моддасига асосан 1 йил овчилик ҳуқуқидан маҳрум қилиб, иш ҳақининг 20 фоизи давлат даромади ҳисобига ушлаб қолинган ҳолда 1 йил 6 ой ахлоқ тузатиш ишлари жазоси тайинланган.
Унда судланувчининг айбига тўлиқ иқрорлиги ва пушаймонлиги, муқаддам судланмаганлиги, жабрланувчига етказилган моддий, маънавий ва бошқа зарарларни тўлиқ қоплаб берганлиги, жабрланувчининг даъвоси йўқлиги инобатга олинган.
Изоҳ (0)