Ўзбекистонда инфляция яна пасайди. Озиқ-овқат ва бошқа маҳсулотлар нархлари қандай ўзгарди?

Мамлакатда йиллик инфляция сезиларли пасайиб, 2016 йилдаги (7,7 фоиз) кўрсаткичга яқинлашди.

Ўзбекистонда 2024 йил март ойида йиллик инфляция 7,98 фоизни, ойлик инфляция 0,7 фоизни ташкил этди. 2023 йил мартда йиллик инфляция кўрсаткичи 11,66 фоиз бўлган.

Статистика агентлиги маълумотларига кўра, март ойида озиқ–овқат маҳсулотлари нархлари февралга нисбатан 0,8 фоизга қимматлашган. Шу билан бирга, ноозиқ-овқат маҳсулотлари нархлари 0,5 фоизга, хизматлар 0,7 фоизга ошган.

Хусусан, гуруч ва гуруч оқшоғи нархи март ойида февралдагига қараганда 0,9 фоизга кўтарилган. Ўтган йилнинг мартига нисбатан эса 26,7 фоиз қимматлашган.

Буғдой уни мартда февралдагидан 0,9 фоизга ошган, суякли мол гўшти 0,2 фоиз, қўй гўшти 0,1 фоизга арзонлашган. 

Баҳорнинг илк ойида сут (янги соғилган) февралдаги нархидан 2,6 фоиз, шакар 1,9 фоизга қимматлашган.

Кунгабоқар ёғи мартда қишнинг охирги ойидаги нархидан 0,1 фоиз, ўтган йилнинг мартидагидан 17,8 фози арзонлашган.

Булғор қалампири нархи мартда февралдагидан 23,4 фоизга ўсди ва бу қолган маҳсулотлар нархларига нисбатан энг юқори кўрсаткичлардан бири бўлди.

Асосий озиқ–овқат маҳсулотларидан картошка нархи февралдагидан 1,3 фоиз, пиёз —1,7 фоиз, сабзи —3,4 фоиз қимматлашган.

Кийим ва пойабзал маҳсулотлари нархи мартда февралдагидан 0,4 фоиз, турар жой учун ижара нархлари 0,4 фоиз ошган. Электр, газ ва ёқилғининг бошқа турлари нархи ошмаган.

Дори воситалари ва тиббиёт маҳсулотлари нархи ўтган ой давомида 2,1 фоиз ўсган.

Давлатга қарашли боғчаларда таълим олиш нархлари ошмаган. Хусусий боғчалардаги таълим эса 0,1 фоиз қимматлашган.