Январь–февраль ойларида Ўзбекистоннинг Марказий Осиё давлатлари билан савдо ҳажми ошди

Январь–февраль ойларида Ўзбекистоннинг Марказий Осиё мамлакатлари билан савдо айланмасидаги энг катта улуши Қозоғистон ҳиссасига тўғри келди – 59 фоиз. Шунингдек, Туркманистон – 19 фоиз, Тожикистон – 12 фоиз ва Қирғизистон – 10 фоизни ташкил этди.

Иқтисодий тадқиқотлар ва ислоҳотлар маркази 2024 йил январь–февраль ойларида Ўзбекистоннинг Марказий Осиё мамлакатлари билан ташқи савдо ҳажми 982,9 миллион долларга етганини маълум қилди. Бу умумий экспорт–импорт ҳажмининг 9,9 фоизига тенг. 2023 йилнинг мос даврида республиканинг Марказий Осиё давлатлари билан жами савдоси 976,8 миллион долларни ташкил этган.

Ўтган икки ой давомида Ўзбекистон қўшни мамлакатлар билан 320,1 миллион долларлик экспорт, 662,8 миллион долларлик импортни амалга оширди.

Хусусан, Ўзбекистоннинг Қозоғистон билан умумий товар айирбошлаш ҳажми 581,5 миллион долларга тенг бўлди. Шундан 166,2 миллион доллари экспорт, 415,3 миллион доллари импорт. 2023 йилнинг мос даврида эса Ўзбекистон–Қозиғистон савдо айланмаси ҳажми 700,2 миллион доллар бўлган. Яъни бу йилги савдо улуши сезиларли қисқарди.

Статистика агентлиги маълумотларига кўра, ўтган икки ой мобайнида Ўзбекистоннинг Туркманистон билан савдо айланмаси ҳажми 184,6 миллион долларни ташкил этган. Ўтган йилнинг мос даврида бу рақам 59,8 миллион доллар бўлган. Жорий январь ва февраль ойларида Туркманистон билан 11,1 миллион долларлик экспорт, 173,5 миллион долларлик импорт операциялари амалга оширилган.

Икки ой ичида Ўзбекистон ва Тожикистон ўртасида 118,5 миллион долларлик маҳсулотлар экспорт–импорт қилинди. Шундан экспорт улуши 79,4 миллион долларни, импорт эса 39,1 миллион долларни ташкил этди. 2023 йил январь–февраль ойларида Ўзбекистон–Тожикистон ташқи савдо айланмаси ҳажми 86,3 миллион доллар бўлган.

Январь–февраль ойларида Ўзбекистоннинг Қирғизистон билан ташқи савдо айланмаси 98,3 миллион долларга пасайди. Бунда экспорт улуши 63,4 миллион доллар, импорт 34,9 миллион доллар бўлган. 2023 йилнинг мос даврида Қирғизистон билан савдо айланмаси ҳажми 168,3 миллион долларни ташкил этганди.

Бугунги кунда Ўзбекистон жаҳоннинг 151 мамлакати билан савдо алоқаларини амалга ошириб келмоқда. Ташқи савдо айланмасининг нисбатан салмоқли ҳиссасига тўғри келадиган ҳамкорлар орасида Марказий Осий минтақасида фақатгина Қозоғистон (жами улуши 5,9 фоиз) мавжуд.

Эслатиб ўтамиз, ўтган икки ойда Ўзбекистон экспорти таркибида товарлар улуши 81,5 фоизни ташкил этди. Улар саноат товарлари (36,4 фоиз), озиқ-овқат маҳсулотлари ва тирик ҳайвонлар (16,8 фоиз), кимёвий воситалар ва шунга ўхшаш маҳсулотлар (6,6 фоиз) ҳиссасига тўғри келмоқда.

Импорт таркибида энг катта улуш машиналар ва транспорт асбоб-ускуналари (38,9 фоиз), саноат товарлари (18 фоиз) ҳамда кимёвий воситалар ва шунга ўхшаш маҳсулотлар (11,8 фоиз) ҳисобига тўғри келди.