Eng noodatiy fobiyalarga ega jahon yulduzlari haqida ma’lumot beramiz.
Mettyu Makkonahi
“Dallaslik xaridorlar klubi”, “Intersteller” va boshqa filmlar yulduzi Mettyu Makkonahi tunnel va aylanadigan eshiklardan qo‘rqadi.
“Bir marta aylanuvchi eshiklardan qo‘rqishimni aytganimda hamma ustimdan kulgandi. Haqiqatan ham bu kulgili. Bolaligimda shunday eshikka qisilib qolganman, shuning uchun ham qo‘rqaman. Iloji bo‘lsa har doim oddiy eshiklardan foydalanaman”.
Aktyor tunnellarni ham yoqtirmaydi. “Bunday joylarda bir-ikki metrdan narini ko‘ra olmaysiz. Oldingizda nima bo‘layotganini yoki u yerda baxtsiz hodisa yuz berganligini hech qachon bilmaysiz”, — deydi u.
Opra Uinfri
Teleboshlovchi saqich chaynamaydi, xodimlariga ham buni taqiqlaydi. Bir marta Opraning mehmonlaridan biri likopchaga saqich yopishtirgan payti ham bo‘lgan. Teleboshlovchi mehmonga nima degani ma’lum emas-u, lekin u o‘sha likopchani tashlab yuborgan.
Unda saqichga nisbatan bunday nafrat qayerdan paydo bo‘lgan? Uinfri kichkinaligida buvisi saqich chaynagani, keyin esa ularni shkaf, divan, stol va stullarga yopishtirib qo‘yganini ko‘rgan. Bu narsa Opraning ruhiyatida o‘z izini qoldiradi.
Rianna
Riannada ihtiyofobiya (baliqdan qo‘rqish) bor. Qo‘shiqchi bolaligida Barbados orolida yashaganida shu qo‘rquv paydo bo‘lgan — u dengizda suzganida barmoqlari orasidan mayda baliq sirg‘alib o‘tadi, bu esa unda jirkanish va vahima uyg‘otadi. Qo‘shiqchi baliqni faqat pishirilgan holda yaxshi ko‘radi.
Kristen Styuart
“Sumerki” yulduzi Kristen Styuart otlardan qo‘rqadi. U ham Rianna kabi bolaligida mazkur qo‘rquvni orttirib olgan. O‘shanda ota-onasi qizini ot sporti maktabiga yuboradi va darslarning birida ot aktrisani uloqtirib yuboradi.
“Bir kuni otdan yiqilib, qattiq shikastlandim. To‘qqiz yoshimda tirsagimni sindirib olganman”. O‘shandan boshlab Styuart hammaga unda gippofobiya borligini, unga psixolog va tinchlantiruvchi vositalar yordam berishini aytadi.
Chak Norris
Aktyor spirtli ichimliklardan qo‘rqadi. Ularning hidini yomon ko‘radi, spirtli ichimlik ichmaydi va barlarga ham bormaydi. Bunga otasi avtosalondagi ishidan so‘ng uyga kelib, shu tarzda “charchog‘ini chiqargani” va doim janjal ko‘targani sabab bo‘lgan. Shu sababli ota-onasi ajrashadi va Norrisning hayoti ancha yaxshilanadi. Ammo u hali ham alkogolli ichimliklar va mast odamlardan uzoqroq yuradi.
Megan Foks
Yulduz qo‘lini qog‘oz kesib olishidan qo‘rqib, qog‘ozlarga yaqinlashmaydi. Hatto ssenariyni o‘qish, xatlarni ochish yoki bolalarining daftarlarini ham tekshirolmaydi. Ammo u buning yechimini topgan. Meganga xat yoki daftarlarni varaqlash uchun yordamchisi yoki bolalari yordam beradi, lekin u ssenariyni laminatlangan shaklda kelgandan keyingina o‘qiydi.
Adel
Mashhur qo‘shiqchi qushlardan, aniqrog‘i, chag‘alaylardan qo‘rqadi. Xonanda ularni juda xunuk, iflos va harakatlarini oldindan aytib bo‘lmaydigan mavjudotlar deb biladi. Adel qushlardan biri uning qo‘lidan muzqaymog‘ini tortib olganida juda qo‘rqib ketgan.
“O‘shanda to‘qqiz yoshda edim. Men xotirjam sayr qilib yurardim. Shunda bir chag‘alay muzqaymog‘imni tortib oldi. Rostini aytsam, u meni ham o‘zi bilan olib ketadi, deb o‘ylagandim”— deydi aktrisa.
Kameron Dias
Dias eshik tutqichlaridan qo‘rqadi — aslida aktrisa ularda to‘planib qolgan juda ko‘p miqdordagi mikroblardan cho‘chiydi. Mashhurning ta’kidlashicha, u jamoat joylarida eshik tutqichlarini ushlashdan ehtiyot bo‘ladi.
Bunday paytlarda u boshqa birovdan eshikni ochishni so‘raydi yoki dastani salfetka bilan ushlaydi. Aktrisa, shuningdek, mikroblardan qutulish uchun qo‘lini tez-tez yuvib turadi.
Kayli Minoug
Ma’lum bo‘lishicha, avstraliyalik estrada xonandasi Kayli Minoug kiyim ilgichlarni yoqtirmaydi. Gap shundaki, u bir-biriga yoki shkafga tegadigan ilgich ovozini yomon ko‘radi:
“Londondagi uyimda barcha narsalarim javonlarga qo‘yilgan maxsus xonam bor. Ilgichlar yo‘q”, — deydi u.
Izoh (0)