“Ўзкомназорат” инспекциясининг Қашқадарё вилоят ҳудудий шўбаси, Электромагнит мослашув хизмати ҳамда шаҳар ИИОФМБ 3-сон ички ишлар бўлими томонидан вилоятнинг қатор ҳудудларида радиомониторинг тадбирлари ўтказилди. Бу ҳақда инспекция матбуот хизмати хабар берди.
Маълум қилинишича, “Алишер Навоий” МФЙ ҳудудида олиб борилган мониторинг давомида, ушбу ҳудудда жойлашган ёқилғи қуйиш шохобчасида 2 (икки) дона “BAOFENG BF888С” русумидаги радиоузатиш қурилмасидан рухсатномасиз фойдаланиб келинаётганлиги аниқланган.
Мазкур ҳолат сабаб, фуқаро томонидан радиоэлектрон воситалар ёки юқори частотали қурилмаларни лойиҳалаш, қуриш (ўрнатиш) ва улардан фойдаланишнинг белгиланган қоидаларини, радиоайирбошлаш ва радиочастоталардан фойдаланиш қоидаларини бузиш, радионурланишнинг техник регламентлари ёки давлат стандартлари, нормалари ва белгиланган тартибда ўрнатилган параметрлари талаблари бузилган.
“Ўзкомназорат” инспекцияси Қашқадарё вилоят ҳудудий шўбаси томонидан ушбу ҳуқуқбузарлик сабаблари ўрганиб чиқилиб, жиноят ишлари бўйича Қарши шаҳар судига юборилган. Суд томонидан ёқилғи қуйиш шохобчаси раҳбарига нисбатан жарима жазоси тайинланган.
Изоҳ (0)